Stök frétt

Ávarp bæjarstjóra Stykkishólms í Hólmgarði þegar ljósin voru tendruð á jólatrénu frá vinabæ okkar Drammen í Noregi 1. desember 2017

Ágætu bæjarbúar.

Í nafni bæjarstjórnar býð ég ykkur velkomin hingað í Hólmgarð á sjálfan fullveldisdaginn.

Við upphaf aðventu komum við saman hér í Hólmgarði sem endranær. Við fögnum  því að jólahátíðin er framundan með táknrænum og hefðbundnum hætti með því að kveikja ljósin á þessu fallega jólatré.

Það voru vinir okkar í Drammen sem sendu okkur Jólatré yfir hafið og var það höggvið í Norskum skógi sem tákn um vináttu okkar og gott samband innan norrænu vinabæjakeðjunnar.

Með þessari athöfn vilja bæjaryfirvöld í Stykkishólmi draga athyglina að jólahaldinu og helgi Jólanna, en um leið skerpa á því einstaka samstarfi við íbúa Drammen og um leið við íbúa vinabæja okkar í Kolding í Danmörku, Örebro í Svíðþjóð  og Lappenranta eða Vildmandstrand í Finnlandi en þar komu fulltrúar vinabæjanna saman í ágúst síðastliðin. Árið 2019 munum við svo taka á móti  þeim hér í Stykkishólmi.

Á vinabæjarmótum eflum við  samband okkar og þar er  lagt á ráðin um bætt samfélag. Reynslu fulltrúa vinabæjanna  er teflt fram til þess að miðla- og um leið að læra það sem best er gert á  norrænum vettvangi á sviði sveitarstjórnarmála og hverskonar samskipta um uppbyggingu.

Þannig er vinabæjasamstarfið notað til þess að  efla þessar Norrænu byggðir og samstöðu þeirra.

Hið Norræna samstarf er okkur Íslendingum mikilvægt. Innan vébanda Norðurlandaráðs vinnum við með frændum okkar og vinum og þar er mótað og eflt það norræna samfélagsmynstur sem svo vel hefur reynst í þágu velferðar og menningarmála jafnt hér á Íslandi sem hinum norðurlöndunum.

Ég vil þakka öllum þeim  sem hafa komið að því að gera þessa stund svo ánægjulega og þá ekki síst vinum okkar í Drammen. Við höfum notið stuðnings  Kvenfélagsins Hringsins  hér í Freyjulundi og hefur Lúðrasveitin leikið hér af sinni alkunnu snilld. 

Starfsmenn Áhaldahúss hafa sett upp tréð  og Grunnskólinn  leggur til fríðan hóp nemenda úr 1.bekk undir stjórn Ásdísar Árnadóttur kennara bekkjarins. Þau munu nú tendra ljósin á Jólatrénu frá Drammen. Við sendum bestu jólakveðjur héðan úr Hólmgarði til þeirra bæjarbúa sem ekki eig þess kost að vera með okkur sem og til vina okkar í Drammen. Ég vil biðja  Gissur Ara Kristinsson íþrótta og tómstundafulltrúa að ganga með  nemendum og kennara að jólatrénu og þakka honum fyrir að skipuleggja þessa stund. Kærar þakkir fyrir að mæta í Hólmgarð og njóta samverunnar og gleðjast saman á Aðventunni.    

 

Gleðilega aðventu- og jólahátíð.