Vegna legu sinnar varð Stykkishólmur snemma á öldum miðstöð verslunar, samgangna og þjónustu við Breiðafjörð. Enn er bærinn kjörinn áfangastaður þeirra sem vilja njóta fjölbreytni í náttúrufari og mannlífi við Breiðafjörð. Þaðan eru daglegar skoðunarferðir yfir sumartímann á bátum út á fjörðinn með Sæferðum og ferjan Baldur tengir Snæfellsnesið við Vestfirði með daglegum siglingum yfir á Brjánslæk.
Mikið kapp hefur verið lagt á að varðveita gömul hús bæjarins og setja gömul hús því sterkan svip á miðbæinn og í því elsta, Norska húsinu, er Byggðasafn Snæfellinga. Þar eru seldir minjagripir og handverksmunir og oft sérstakar sýningar á vegum safnsins eða listamanna. Fjölmargt handverksfólk er í Stykkishólmi og handverksmarkaður er opinn á sumrin. Á einum fallegasta útsýnisstaðnum er Vatnasafnið staðsett. Bandaríska listakonan Roni Horn mótaði Vatnasafnið í samhljómi við hina einstöku staðsetningu hússins, með yfirsýn yfir haf, höfn og bæ. Vatnasafnið er opið daglega yfir sumartímann.
Nýja kirkjan á Borginni er áberandi kennileiti af sjó og landi. Hún er opin ferðamönnum og auk venjulegs helgihalds eru þar haldnir tónleikar a.m.k. hálfsmánaðarlega yfir sumarið. Veitingastaði og kaffihús má finna í Hólminnum auk hótela og annarra gististaða.
Samgöngur við Stykkishólm eru góðar. Til Reykjavíkur eru 172 km og þangað eru daglegar áætlunarferðir allt árið. Á sumrin eru auk þess fastar ferðir milli kaupstaðanna á norðanverðu Snæfellsnesi.
í Stykkishólmi og innan seilingar eru frægir sögustaðir og náttúruminjar í Helgafellssveit og þar eru meðal annars starfræktar hestaleigur, bændagisting og athyglisverð í Bjarnarhöfn sem notið hefur vinsælda meðal ferðafólks.
Ferjan Baldur heldur uppi reglubundnum ferðum yfir Breiðafjörð. Á sumrin fer hún tvær ferðir daglega milli Stykkishólms og Brjánslækjar með viðkomu í Flatey þar sem ferðafólki gefst kostur á að dvelja hluta úr degi í friðsælu þorpi sem á sér langa og merka sögu. Farþegabátar Sæferða bjóða mönnum ferðir um nálæg eyjasund og um Breiðafjörð frá Öndverðarnesi að Látrabjargi. Kynnast má íbúum sjávardjúpanna, allt frá smæstu kvikindum til stærstu skepna jarðarinnar, og hvergi á landinu eru sjávarföll greinilegri né stórfenglegra að sigla um straumrastir og boðaföll í þröngum eyjasundum. Ferðafólk kemst í nána snertingu við fjölskrúðugt fuglalíf á siglingu um Breiðafjörð og ekki er ólíklegt að konungur íslenskra fugla, haförninn, sjáist á sveimi í leit að æti.
Í íþróttamiðstöðinni er líkamsræktarstöð og sundlaug sem opin er allt árið. Í sundlauginni er skemmtileg rennibraut fyrir börnin og einnig heitir pottar með vottuðu náttúruvatni sem kemur beint úr borholunni. Vatnið er rómað fyrir lækningarmátt enda efnainnihaldsríkt og virkar vel á ýmis konar húðvandamál. Auk knattspyrnu- og frjálsíþróttavallarins eru á lóð Grunnskólans malbikaður körfuboltavöllur og sparkvöllur sem eru opnir öllum. Góður 9 holu völlur Golfklúbbsins Mostra er sunnan við tjaldstæðið. Klúbbhús Mostra er einnig þjónustuhús fyrir tjaldstæðið á sumrin. Danskir dagar eru haldnir þriðju helgina í ágúst ár hvert og þá gera bæjarbúar og gestir þeirra sér glaðan dag með dansi, söng og ýmsum listviðburðum. Fjölbreytni náttúru og lífríkis á Snæfellsnesi og við Breiðafjörð er rómuð. Í bæjarlandi Stykkishólms og nágrenni eru greiðar gönguleiðir um fjörur, tanga og góða útsýnisstaði, s.s. Súgandisey við höfnina.
Göngur á nálæg fjöll, s.s. Helgafell, Drápuhlíðarfjall og Kerlingarfjall eru á færi flestra og stutt er á söguslóðir, gönguferð eftir Berserkjagötunni stendur alltaf fyrir sínu.
Bæklingur um afþreyingarmöguleika í Stykkishólmi