31. janúar 2012

Lífshlaupið af stað á morgun

Lífshlaupið, heilsu- og hvatningarverkefni Íþrótta- og Ólympíusambands Íslands verður ræst í fimmta sinn á morgun, miðvikudaginn 1. febrúar.

Hægt er að taka þátt í vinnustaðakeppni, hvatningarleik grunnskólanna og einstaklingskeppni.  Markmið Lífshlaupsins er að hvetja almenning til að hreyfa sig og huga að sinni daglegu hreyfingu í frítíma, heimilisstörfum, vinnu, skóla og við val á ferðamáta.

Skrá má alla hreyfingu inn á vefinn svo framarlega sem hún nær ráðleggingum embætti landslæknis um hreyfingu. Börnum og unglingum er ráðlagt að hreyfa sig í a.m.k. 60 mínútur á dag og fullorðnir a.m.k. 30 mínútur á dag.

Á síðasta ári tóku um 16.400 landsmenn þátt í Lífshlaupinu og var mikil og góð stemninga jafnt á vinnustöðum sem skólum í febrúar. Hægt er að nálgast frekari upplýsingar á vefslóðinni http://www.lifshlaupid.is/

Vinnustaðir, grunnskóli og einstaklingar í Stykkishólmi eru hvattir til þátttöku og nota þannig tækifærið til að skapa létta stemningu og efla í leið líkama, sál og félagsandann með því að hreyfa sig daglega.

Samstarfsaðilar ÍSÍ vegna Lífshlaupsins eru: Mennta- og menningarmálaráðuneytið, velferðarráðuneytið, embætti landslæknis, Advania, Rás 2 og Ávaxtabíllinn.

www.lifshlaupid.is