Kvikmyndin “Baldur - vegur yfir Breiðafjörð” er heimildamynd um flutninga á farþegum og vörum til byggðarlaga í og við Breiðafjörð á öllum árstíðum.
Kvikmyndin er tekin á nokkurra ára tímabili í lok síðustu aldar og er byggð upp í kringum “Baldur” 193 brl. bát sem þjónaði íbúum og ferðamönnum farsællega í rúman aldarfjórðung.
Í myndinni er einnig fylgst með byggingu á 7. kynslóð “Baldurs” hjá skipasmíðastöð Þorgeirs og Ellerts á Akranesi. Það var hátækniskips þess tíma og kom til heimahafnar í Stykkishólmi 5. apríl 1990.
Framleiðandi myndarinnar er Óli Örn Andreassen kvikmyndagerðarmaður og er hann jafnframt aðalmyndatökumaður. Texti myndarinnar er skrifaður af Guðmundi Lárussyni og þulur í myndinni er Ævar Kjartansson.
Kvikmyndin er merkileg heimild um liðna tíð, þar sem t.d. flutningur á bílum yfir Breiðafjörð eins og hann er sýndur í myndinni myndi í dag kallast nokkuð frumstæður.
Nú verður almenningi gefinn kostur á að útvega sér myndina, en hún verður gefin út á DVD disk n.k. þriðjudag.
Af því tilefni mun framleiðandi myndarinnar afhenda Sturlu Böðvarssyni, forseta Alþingis og þingmanni norðvesturkjördæmis, fyrsta eintak myndarinnar.
Sturla var góður stuðningsmaður á lokastigi myndvinnslunnar þegar hann var ráðherra samgöngumála.
Afhending myndarinnar og frekari kynning á henni fyrir fjölmiðla fer fram á veitingastaðnum Fimm fiskar í Stykkishólmi þriðjudaginn 31. júlí kl. 11.00.
Eftir kynninguna verður myndinni dreift á sölustaði á Snæfellsnesi.
Einnig er unnt að panta hana á netfanginu: baldurdvd@gmail.com
Með kveðju,
Óli Örn Andreassen
Sími: 8439990