4. nóvember 2002

Tónfundur í leikskóla

Föstudaginn 1. nóvember kom 1. bekkur grunnskólans í heimsókn í leikskólann með blokkflauturnar sínar.  Er það liður í samstarfi leikskólans, grunnskólans og tónlistar-skólans en blokkflautukennsla er nú inni í stundatöflum 1. og 2. bekkjar.

Tónfundurinn hófst með því að nemendur 1. bekkjar spiluðu og sungu sex lög.  Eftir það sungu nemendur leikskólans ný lög sem þau hafa verið að læra og endað var á samsöng.  Mjög vel þótti til takast og er stefnt að því að hafa slíka tónfundi einu sinni í mánuði í vetur þar sem verður sungið og spilað saman.

Nú er nýlokið "skiptinemaheimsóknum" á milli elstu nemenda leikskólans og nemenda 1. bekkjar en þær eru liður í því að brúa bilið á milli skólastiganna.  Börnin fóru í þremur hópum og voru nemendur leikskólans í tvær klukkustundir hjá Kristborgu í 1. bekk á meðan að nemendur grunnskólans rifjuðu upp gamlar og góðar stundir í leikskólanum.

Umsjón með samstarfi skólanna hafa Elísabet L. Björgvinsdóttir, leikskólakennari, Hafsteinn Sigurðsson, tónlistarkennari og Kristborg Haraldsdóttir, grunnskólakennari.