26. febrúar 2003

SSV þróun og ráðgjöf

Starfsmenn SSV og Atvinnuráðgjafar Vesturlands voru á ferðinni í Stykkishólmi í gær, þriðjudaginn 25. febrúar, ásamt atvinnumálanefnd Stykkishólmsbæjar og heimsóttu þau 27 fyrirtæki í Stykkishólmi.

Almennt fannst þeim ríkja bjartsýni hjá forsvarsmönnum fyrirtækja í bænum, þrátt fyrir sviptingar í atvinnulífi á staðnum vegna vegna mikils samdráttar í veiðiheimildum á hörpudiski á Breiðafirði en SSV þróun og ráðgjöf er að vinna að skýrslu um samfélagsleg áhrif samdráttarins á Stykkishólm.

Um kvöldið var haldinn opinn fundur um atvinnumál á Hótel Stykkishólmi og mættu um 90 manns á fundinn.  Framsögumenn voru Ólafur Sveinsson, forstöðumaður ATSSV, Erla Björg Guðrúnardóttir, framkvæmdastjóri Heilsueflingar Stykkishólms, Róbert A. Stefánsson, forstöðumaður Náttúrustofu Vesturlands og Guðrún Þórarinsdóttir, sérfræðingur á Hafró. 

Ólafur kynnti starfsemi SSV-þróun og ráðgjöf, en fjórir starfsmenn eru á þeirra vegum og þar af er einn starfsmaður staðsettur hér í Stykkishólmi og hvatti hann fólk til að nýta sér þjónustuna sem þau bjóða upp á.  Þá flutti Erla Björg fyrirlestur um verkefni sem Heilsueflingin er farin af stað með undir heitinu "Dýrðardagar í Stykkishólmi" en það eru þrjár tegundir af námskeiðum sem verða hér í Stykkishólmi á vordögum, sjá nánar á heimasíðu þeirra. Róbert Arnar flutti fyrirlestur um sóknarfæri í rannsóknum og þróun og kynnti starfsemi Náttúrustofu Vesturlands.  Síðasti frummælandinn var Guðrún og ræddi hún m.a. um möguleika á hörpudiskeldi ásamt því að kynna hugsanlegar orsakir á ástandi hörpudiskstofnsins m.a. hækkun sjávarhita, áhrif veiðarfæra o.fl.  Sýni af lifandi hörpudiski voru send til tilraunastöðvarinnar á Keldum í lok síðasta árs til rannsókna og er niðurstöðu þeirra rannsókna að vænta á næstunni.

Ýmsar fyrirspurnir komu úr sal að lokinni framsögu þeirra og voru aðstandendur fundarins ánægðir með hvað fundarmenn tóku góðan þátt í fundinum sem var vel heppnaður og athyglisverður.