4. mars 2003

Upplestrarhátíð 7. bekkjar

Í gær fór upplestrarhátíð nemenda í 7. bekk Grunnskólans í Stykkishólmi fram í Stykkishólmskirkju.  9 nemendur tóku þátt og nemendur Tónlistarskóla Stykkishólms komu fram.

Fóru krakkarnir með óbundinn og bundinn texta og var 3 manna dómnefnd í því vandasama hlutverki að velja 3 nemendur úr hópi þátttakenda sem allir stóðu sig framúrskarandi vel. 

Þrjár stúlkur þær Brynja Ólafsdóttir, Kristín Lilja Gunnsteinsdóttir og Sigrún Björk Sævarsdóttir voru valdar úr hópnum til að fara á Hellissand nk. mánudag 10. mars í áframhaldandi keppni milli skólanna á Nesinu og óskum við þeim velfarnaðar á þeim vettvangi.

Stóra upplestrarkeppnin hefst ár hvert á degi íslenskrar tungu og lýkur í mars með því að valdir eru 3 bestu upplesarar í hverju byggðarlagi.

Eins og sjá má hér að neðan var yndislegt að koma út að lokinni keppninni, kvöldstilla og fegurð yfir Snæfellsnesinu.