3. júlí 2003

Sýningar á jarðhæð Norska hússins

Laugardaginn 5. júlí nk. kl. 14.00 opna  tvær sýningar á jarðhæð Norska hússins.  Ebba Júlíana Lárusdóttir sýnir glerlistaverk í bláa salnum og Listagalleríið Samlagið,  sem samanstendur af 15 listamönnum sem allir tengjast galleríinu Samlaginu á Akureyri, sýnir í gyllta salnum.

Ebba Júlíana Lárusdóttir sýnir glerlistaverk í blá sal Norska hússins.  Ebba Júlíana er fædd og uppalin í Stykkishólmi, hún er dóttir hjónanna Ástu Pálsdóttur og Lárusar Elíassonar, hafnarvarðar.  Ebba hefur lagt stund á glerlist síðan 1988, en hún lærði glerbræðslu hjá Chris Ellis og glerblástur í Portland Press Studio í Texas.

Ebba hefur haldið fjölda einka- og samsýninga hér heima og erlendis, m.a. hefur hún áður haldið sýningar í Norska húsinu og munir hennar hafa verið til sölu í krambúð Norska hússins.  Sýningin samanstendur að mestu af veggmyndum og skálum sem sýna vel þær nýju brautir sem Ebba Júlíana fetar nú í listsköpun sinni.

Í gyllta salnum sýna 15 listamenn sem allir tengjast galleríinu Samlaginu á Akureyri.  Samlagið rekur listmunaverslun í gilinu á Akureyri þar sem myndlistarmenn af Norðurlandi hafa til sýnis og sölu verk sín, sem eru m.a. vefnaður, leir, málverk, grafík, teikningar og mósaík.  Á þessari sýningu verða sett upp smærri myndverk eftir félagsmenn en samsvarandi sýningar félagsmanna úr Samlaginu eru í sumar settar upp m.a. á Akureyri, í Reykjavík, á Egilsstöðum og Blönduósi.

Í Krambúðinni eru forvitnilegar og spennandi vörur til sölu og í sýningaraðstöðunni í Brokeyjarstofu verður sett upp athyglisverð sýning úr fórum safnsins.  Heldra heimili á 19. öld er á annarri hæð hússins og samkvæmt áreiðanlegum heimildum er talsvert af draugum sem leika lausum hala uppi í risinu.

Sýningarnar á jarðhæðinni standa til 28. júlí en húsið er opið daglega í sumar frá kl. 11-17.

Verið velkomin í Norska húsið.