Skólaslit tónlistarskólans fóru fram á uppstigningardag, 17. maí. Stundin var hátíðleg í Stykkishólmskirkju þegar rifjað var upp það helsta sem afrekað var á skólaárinu ásamt því að hlusta á fjölbreytt tónlistaratriði.
Greint var frá 29 áfanga- og stigsprófum:
16 nemendur tóku tónfræðapróf:
8 nemendur tóku 1. stig , einn þeirra tók líka 2. stig.
5 nemendur tóku 4. stig
2 nemendur tóku framhaldsstig
13 nemendur tóku hljóðfærapróf:
6 nemendur tóku 1. stig
2 nemendur tóku 2. stig
1 nemandi tók grunnpróf á vegum Prófanefndar tónlistarskólanna
2 nemendur tóku miðpróf á vegum Prófanefndar tónlistarskólanna
2 nemendur tóku framhaldspróf á vegum Prófanefndar tónlistarskólanna, auk þess að halda framhaldsprófstónleika.
Á 48 ára sögu tónlistarskólans eru píanóleikararnir Berglind Gunnarsdóttir og Páll Gretarsson fyrstu nemendurnir til að ljúka framhaldsprófi. Af því tilefni fengu þau afhentar sérstakar viðurkenningar frá Kvenfélaginu Hringnum og Lionsklúbbi Stykkishólms sem hvatningu til frekari dáða á tónlistarbrautinni.
Rifjaður var upp góður árangur nemenda skólans á uppskeruhátíð tónlistarskólanna í landinu, Nótunni 2012, en á svæðistónleikunum á Akranesi fengu öll þrjú atriði skólans sérstaka viðurkenningu fyrir frábæran flutning og eitt þeirra, Trommusveitin, fór sem fulltrúi landshlutans á lokahátíðina í Hörpu og fékk þar verðlaun líka fyrir samspil á grunnstigi. Trommusveitin kemur því fram í sérstökum sjónvarpsþætti RÚV sem verið er að gera um hátíðina.
Á skólaslitum heiðruðu viðstaddir minningu Hafsteins Sigurðssonar fyrrverandi kennara skólans sem lést 1. mars s.l., með því að rísa úr sætum. Og í lok athafnarinnar fluttu kennarar skólans lag eftir hann.
Hafin er skráning fyrir næsta skólaár og er umsóknarfrestur til 5. júní. Best er að sækja um beint á netinu, á heimasíðu skólans.
Meðfylgjandi mynd sýnir píanónemana Berglindi og Pál í lok framhaldsprófstónleikanna 13. maí.
Næstkomandi sunnudag, 13. maí kl. 17:00, halda Berglind Gunnarsdóttir og Páll Gretarsson píanótónleika í Stykkishólmskirkju.
Tónleikarnir eru hluti af framhaldsprófi þeirra, en þau hyggjast ljúka framhaldsprófi í píanóleik í vor. Áður hafa tveir nemendur klárað hljóðfærahluta framhaldsprófsins en eiga eftir að ljúka bóklegu greinunum. Þetta er því í fyrsta sinn sem skólinn útskrifar nemendur af framhaldsstigi.
Á efnisskránni er fjölbreytt efni úr píanótónbókmenntunum, m.a. tónverkin sem þau léku á sjálfu píanóprófinu nú fyrr í vor með glæsilegum árangri.
Tónleikarnir eru öllum opnir og ókeypis aðgangur.
Nú er innritun hafin fyrir næsta skólaár í Tónlistarskóla Stykkishólms. Innritun fer fram á netinu á heimasíðu skólans. Hægt er að nálgast umsóknareyðublöðin HÉR.
Þeir sem óska eftir hljóðfæra- eða söngnámi næsta vetur eru hvattir til að sækja um sem fyrst. Ath. að vanda vel útfyllingu umsóknarinnar. Athugið t.d. að hafa ENGIN BIL þegar slegið er inn kennitölum eða símanúmerum.
Innritun lýkur 5. júní.
Nú hyllir undir skólalok í tónlistarskólanum. Framundan er tónleikavika (7.-10. maí) þar sem stefnt er að því að allir nemendur skólans fái tækifæri til að koma fram. Er þá flutt brot af þeirri tónlist sem æfð hefur verið á vorönn.
 |
| Gauti og Einar á vortónleikum 2011 |
Yfirlit yfir tónleikana má sjá í skjali sem birtist
HÉR.
Skólaslit verða fimmtudaginn 17. maí (á uppstigningardag) kl. 14:00 í Stykkishólmskirkju.
Af mörgum samverkandi ástæðum hefur verið ákveðið að AFLÝSA hefðbundnum vortónleikum Lúðrasveitar Stykkishólms þetta árið.
Þrátt fyrir það fá bæjarbúar tækifæri til að hlusta á hljómsveitirnar við hin ýmsu tækifæri og heyra þá hið fjölbreytta og skemmtilega efni sem búið er að æfa:
- Víkingasveitin leikur fyrir hátíðargesti á Hótel Stykkishólmi á verkalýðsdaginn 1. maí
- Litla Lúðró, Víkingasveitin og Trommusveitin munu leika á skólaslitunum 17. maí
- Allar sveitirnar taka á móti norskri vinahljómsveit og leika með henni um sjómannadagshelgina
- Stóra Lúðró leikur að sjálfsögðu á þjóðhátíðardaginn 17. júní