17. apríl 2012 11:09

Vortónleikar lúðrasveitarinnar

Mynd frá æfingu í sal skólans í haust

Að vanda verður efnisskráin fjölbreytt og skemmtileg, en á tónleikunum koma fram Stóra Lúðró, Litla Lúðró, Trommusveitin (sem vann til verðlauna á Nótunni 2012) og síðast en ekki síst Víkingasveitin. Stjórnandi er Martin Markvoll.

Eins og fyrr segir er efnisskráin afar fjölbreytt. Litla Lúðró var t.d. með æfingabúðir nú á laugardaginn var og á foreldratónleikum sem voru í lokin lék hún sýnishorn af skemmtilegum lögum sem hún mun spila á tónleikunum. Trommusveitin er til alls vís og spurning hvort hún mætir í gömlu búningunum eða ekki. Víkingasveitin sem skemmti gestum á lokahátíð Nótunnar í Hörpu við mikinn fögnuð mun einnig kæta gesti vortónleikanna með nokkrum snjöllum lögum. Og ekki má gleyma kjölfestunni, sjálfri Stóru Lúðró, sem verður með fjölbreytta og skemmtilega efnisskrá – janvel ótrúlega!

Þá er bara að hvetja alla til að mæta, enda má enginn missa af þessum árlega viðburði!

25. nóvember 2011 11:12

Hausttónleikar - búningar - foreldrafundur LS

Litla Lúðró í nýju vestunum (ljósm. AM)

Á tónleikunum á hótelinu komu báðar sveitirnar fram og stóðu sig mjög vel. Þetta var í fyrsta sinn sem spilað var í nýjum vestum, fagurrauðum, eins og má sjá á myndinni.

Skólatónleikar voru svo föstudaginn 18. nóvember, eins og venja er til. Þar slógu báðar sveitirnar í gegn aftur og enduðu glaðir tónleikagestir á að marsera út við dynjandi hljóðfæraslátt Stóru Lúðró.

21. september 2011 11:46

Munir í óskilum

Til ykkar sem eruð eða hafið verið í Lúðrasveit Stykkishólms síðustu ár.

Okkur vantar heilmikið af nótum og möppum sem okkur grunar að liggi hjá ykkur sumum úti í bæ. Biðjum við ykkur vinsamlegast að kíkja nú í hillur og vita hvort þið finnið hjá ykkur eitthvað af eftirtöldu:

- Svört lúðrasveitarmappa (A4) – með merki sveitarinnar

- Dökkblá lúðrasveitarmappa (A4) – með merki sveitarinnar

- Skrúðgöngumappa með svörtu plasti sem fest er á hljóðfærið

- Hvít jólalagabók (13 jólalög)

- Rauð jólalagabók (13 lög til jóla)

- Hvít bók (A5) með ættjarðarlögum (fremst er þjóðsöngurinn „Ó, Guð vors lands“)

- Græn bók sem heitir „The Goldman Band System“ (A5)

Ef þið finnið hjá ykkur eitthvað af þessu væri frábært að þið kæmuð því til okkar í tónlistarskólann sem allra fyrst.

Ef þið vitið um búninga eða hljóðfæri í eigu lúðrasveitarinnar er best að koma því hingað líka.

Martin og Jóhanna  

2. september 2011 11:03

Fyrstu æfingar lúðrasveitanna

Nú eru báðar lúðrasveitirnar byrjaðar að æfa. Fyrstu æfingarnar voru nú í vikunni og tókust mjög vel. Martin Markvoll hefur tekið við stjórn sveitanna á ný. Hann er ánægður að heyra hvað krökkunum hefur farið mikið fram og hlakkar til að vinna með þeim aftur.

Lúðrasveitirnar stefna á hefðbundna tónleika í vetur, hausttónleikarnir verða í nóvember, Litla Lúðró ætlar að heimsækja leikskólann nokkrum sinnum og Stóra Lúðró stefnir á æfingabúðir og kannski á landsmót í október. Fréttir verða sagðar reglulega á heimasíðu skólans. 

24. ágúst 2011 11:27

Fyrsta æfing Lúðrasveitar Stykkishólms

Martin er kominn!

FYRSTA ÆFING:

- LITLA LÚÐRÓ: miðvikudaginn 31. ágúst kl. 14:00 - 14:45

- STÓRA LÚÐRÓ: fimmtudaginn 1. september kl. 16:44 - 18:44