Starfsemi félags- og skólaþjónustunnar

Skóla- og fræðslunefnd lýsir yfir miklum áhyggjum vegna skorts á sálfræðiþjónustu fyrir leik- og grunnskóla. Nefndin leggur til að starfið sé auglýst með starfstöð á Snæfellsnesi og ráðinn verði verktaki til starfsins á meðan fastur starfsmaður fæst ekki til starfa.

Sveinn Þór Elínbergsson stóð fyrir svörum um starfsemi og þjónustu félags- og skólaþjónustunnar. Ekki hefur tekist að ráða skólasálfræðing, en verktakar hafa sinnt hluta starfsins þetta skólaárið. Auglýst verður á ný eftir sálfræðingi.

Skóla- og fræðslunefnd lýsir áhyggjum sínum á skorti á þjónustu frá Félags- og skólaþjónustunni við skóla í Sveitarfélaginu Stykkishólmi. Nefndin fagnar þó væntanlegum breytingum á næsta skólaári, þar sem samstarf barnaverndarþjónustu mun gera félagsráðgjöfum þjónustunnar kleift að sinna skólafélagsráðgjöf í meira mæli. Skóla- og fræðslunefnd telur brýnt að Félags- og skólaþjónustan bæti upplýsingagjöf til foreldra, barna, skólastjórnenda og starfsfólks skóla um þá þjónustu sem í boði er. Til að mynda með fundi með leik- og grunnskólastjórum í upphafi skólaárs. Forstöðumaður tók vel í að einn félagsráðgjafi sinnti skólaráðgjöf fast í hverju sveitarfélagi.

Bæjarráð tekur undir afgreiðslu skóla- og fræðslunefndar og leggur jafnframt til að farið verði í endurskoðun á þjónustunni að höfðu samráði við þau sveitarfélög sem að henni standa. Mikið ákall hefur verið um úrbætur í þessum málaflokki og því brýnt að bregðast við og finna lausn sem styrkir þjónustu skólanna enn frekar en ákveðin vöntun á t.d. sérfræðiþjónustu hefur verið viðvarandi í nokkurn tíma.

Ingveldur segir frá starfi Félags- og skólaþjónustunnar. Félags- og skólaþjónustan vill auka þjónustu við skólana.

Skóla- og fræðslunefnd fagnar auknu samstarfi Félags- og skólaþjónustunnar við skóla á svæðinu.

Skóla- og fræðslunefnd styður beiðni Félags- og skólaþjónustunnar um að ráða til sín starfsmann í starf málstjóra fyrir skólana.

Ingveldur yfirgaf fundinn.

Skóla- og fræðslunefnd ítrekar fyrri bókanir varðandi Félags- og skólaþjónustu FSSF og óskar eftir að skólanefndir Grundarfjarðarbæjar og Snæfellsbæjar fjalli um málið, þar sem þjónustan er þvert á sveitarfélögin. Jafnframt telur nefndin nauðsynlegt að endurskoða samning sveitarfélaganna við FSSF, einkum hvað varðar áherslur í starfsemi og framkvæmd skólahluta þjónustunnar, sem nefndin telur ekki hafa verið í samræmi við þarfir skólanna.

Það er mat skóla- og fræðslunefndar að skoða þurfi alvarlega störf Félags- og skólaþjónustu Snæfellinga (FSSF) varðandi skólaþjónustu stofnunarinnar og áréttar skóla og fræðslunefnd fyrri bókanir nefndarinnar varðandi skólaþjónustuhluta FSSF.

Vill skóla- og fræðslunefnd minna á sameiginlega ályktun skólastjórnenda á Snæfellsnesi frá 1. febrúar 2021 varðandi nauðsyn þess að bæta um betur í skólaþjónustu á Snæfellsnesi. Ákveðið var í framhaldinu að boðað skildi til fundar með FSSF, fulltrúum Fjölbrautarskóla Snæfellinga og skólastjórnendum, skólanefndum og bæjarfulltrúum þeirra sveitarfélaga sem standa að þjónustunni þar sem taka átti til umræðu stöðu skólaþjónustunnar á Snæfellsnesi. Fyrrgreindur fundur fór aldrei fram, væntanlega sökum faraldursins. Skóla- og fræðslunefnd leggur því til við bæjarstjórn Stykkishólms að óskað verði eftir því að umræddur fundur verði haldinn sem allra fyrst.

Á fundinum væri mögulegt að taka til umræðu hvort halda eigi samstarfinu áfram hvað varðar skólaþjónustu á Snæfellsnesi eða hvort beina ætti kröftum FSSF einungis að félags- og velferðarþjónustu. Jafnframt væri hægt að meta hvort hagsmunum barna á svæðinu væri betur borgið með samstarfi við aðra skólaþjónustu, til dæmis í Borgarbyggð, eða með samvinnu um skólaþjónustu á stærra svæði.

Þó skóla- og fræðslunefnd telji að staðan sé og hafi lengi verið óviðunandi hvað þennan þátt varðar í starfsemi stofnunarinnar, vill nefndin leggja áherslu á að þar er ekki við núverandi starfsfólk eða forstöðumann að sakast.