Fjárhagsáætlun Sveitarfélagsins Stykkishólms 2026–2029 – jákvæður og stöðugur rekstur
Bæjarstjórn Sveitarfélagsins Stykkishólms hefur samþykkt fjárhagsáætlun fyrir árið 2026 og þriggja ára áætlun 2027–2029. Áætlunin er unnin út frá forsendum og markmiðum sem bæjarstjórn setti í upphafi vinnu við gerð fjárhagsáætlunar og er afrakstur góðrar samvinnu kjörinna fulltrúa og starfsfólks sveitarfélagsins og endurspeglar ábyrga fjármálastjórn, jákvæðan rekstur og nauðsynlegar en hóflegar innviðafjárfestingar.
Í fyrirliggjandi fjárhagsáætlun er lögð rík áhersla á aðhald og ábyrgð í rekstri sveitarfélagsins á sama tíma og þjónusta við íbúa er tryggð og efld. Fjárhagsáætlunin byggir á jafnvægi í rekstri, sterku veltufé frá rekstri og markvissri lækkun skulda og skuldaviðmiðs á næstu árum.
Markmið fjárhagsáætlunar
Í forsendum er gert ráð fyrir 3,5% verðbólgu yfir árið 2026, 3,2% árið 2027, 2,5% 2028 og 2,5% árið 2029, í samræmi við þjóðhagsspá sem gefin er út af Hagstofu Íslands. Gert er ráð fyrir því að meðalraunvextir lána verði um 2,6% á árunum 2026- 2029. Auk framangreinds gera forsendur ráð fyrir því að gjaldskrár sveitarfélagsins muni almennt hækka um 4% á ári á árunum 2026-2029.
Helstu markmið fjárhagsáætlunarinnar eru að tryggja jafnvægi í rekstri á tímabilinu, að framlegðarhlutfall haldist um 15%, að veltufjárhlutfall nálgist 0,7 og að reksturinn skili nægu fé til að standa undir afborgunum lána. Gangi áætlanir eftir lækkar skuldaviðmið sveitarfélagsins í 99,7% árið 2026 og fer niður í 83% árið 2029 sem er vel undir lögbundnu 150% hámarki.
Jákvæður og stöðugur rekstur – Jafnvægisregla uppfyllt
Í fjárhagsáætlun sveitarfélagsins er gert ráð fyrir jákvæðri rekstrarniðurstöðu samstæðu A- og B-hluta upp á 133,5 milljónir króna á árinu 2026 og veltufé frá rekstri sem nemur 295 milljónum króna. Handbært fé í árslok er áætlað 86 milljónir króna.
Í 64. gr. sveitarstjórnarlaga nr. 138/2011 er að finna tvö fjárhagsleg viðmið, jafnvægisreglu og skuldaviðmið. Hvað jafnvægisregluna varðar þá kveður hún á um að samanlögð heildarútgjöld til rekstrar vegna A- og B-hluta séu á hverju þriggja ára tímabili ekki hærri en reglulegar tekjur. Samkvæmt fyrirliggjandi ársreikningi 2024, útgönguspá 2025 og fjárhagsáætlun 2026-2029 er jafnvægisreglunni vel mætt í rekstri sveitarfélagsins.
Áætlunin endurspeglar þannig stöðugan rekstur og er í samræmi við staðfestan ársreikning 2024 og útgönguspá fyrir 2025 og sýna niðurstöður að rekstur sveitarfélagsins hefur náð jafnvægi á ný eftir krefjandi ytri aðstæður síðustu ára.
Skuldaviðmið og skuldahlutfall lækka áfram – Langt undir lögbundnum viðmiðum
Hvað skuldaviðmið varðar þá kveða sveitarstjórnarlög um að heildarskuldir og skuldbindingar A- og B-hluta í reikningsskilum skuli ekki vera hærri en sem nemur 150% af reglulegum tekjum.
Í fjárhagsáætlun sveitarfélagsins 2026-2029 er gert ráð fyrir að skuldaviðmið verði 99,7% á árinu 2026 sem er langt undir lögbundnum viðmiðum og lækki árlega og verði 83% í árslok 2029.
Hér má sjá þróun skuldaviðmiðs og skuldahlutfalls síðustu ára ásamt áætlunum 2026-2029.
Lækkun álagningahlutföllum fasteignagjalda – stuðningur við heimili og atvinnulíf
Í fjárhagsáætlun 2026 var lögð sérstök áhersla á að mæta íbúum og fyrirtækjum með lækkun fasteignagjalda og annarra álagningarliða sem tengjast fasteignum.
Álagningarstuðull fasteignaskatts á íbúðarhúsnæði lækkar í 0,38%, lóðarleiga á íbúðarhúsnæði lækkar í 0,95% og holræsagjald í A-flokki lækkar í 0,15%.
Á atvinnuhúsnæði lækkar fasteignaskattur í 1,50%, lóðarleiga í 1,99% og holræsagjald í 0,18%. Þessar breytingar eru til þess fallnar að draga úr áhrifum hækkunar fasteignamats og létta undir með heimilum og atvinnurekendum í sveitarfélaginu.
Hóflegar fjárfestingar og áhersla á niðurgreiðslu lána á næstu árum
Fjárfestingaáætlunin gerir ráð fyrir 400 millj. kr. í fjárfestingahreyfingum á árunum 2026–2029, en fjárfestingar verða fjármagnaðar með hóflegri lántöku, veltufé frá rekstri og sölu eigna.
Á sama tíma er lögð sérstök áhersla á að halda áfram markvissri niðurgreiðslu skulda. Á næstu fjórum árum er gert ráð fyrir rúmlega 1.000 milljóna króna afborgunum langtímalána, sem skilar sér í áframhaldandi lækkun skuldaviðmiðs og bættum efnahag sveitarfélagsins.
Með þessari nálgun er tryggt að fjárfestingar sem styrkja grunninnviði og þjónustu við íbúa stefni ekki fjárhagslegum stöðugleika sveitarfélagsins í hættu. Þvert á móti er horft til þess að skuldahlutföll haldi áfram að lækka á tímabilinu, jafnvel þótt ráðist sé í nauðsynlegar framkvæmdir sem styðja við vaxandi samfélag og áframhaldandi þróun sveitarfélagsins.
Sveitarfélagið Stykkishólmur byggir á traustum grunni og framtíðin er björt
Sveitarfélagið Stykkishólmur hefur á undanförnum árum byggt upp traustan rekstrargrundvöll og aukið fjárhagslegt svigrúm, á sama tíma og mætt hefur verið stöðugri fjölgun íbúa með aukinni þjónustu og nauðsynlegum innviðafjárfestingum, m.a. viðbyggingum við skólamannvirki og uppbyggingu í Víkurhverfi.
Reksturinn hefur náð jafnvægi þrátt fyrir framangreint og skuldaviðmið og skuldahlutföll haldið áfram að lækka, í samræmi við markmið bæjarstjórnar um ábyrga fjármálastjórn.
Lögð hefur verið áhersla á að skapa eftirsóknarvert umhverfi fyrir fólk og fyrirtæki, standa vörð um öfluga grunnþjónustu, sérstaklega fyrir börn, fjölskyldur og eldra fólk, og sækja af ábyrgð fram með samfélagslega mikilvægum innviðafjárfestingum.
Þessar áherslur endurspeglast í samþykktri fjárhagsáætlun 2026–2029 sem heldur áfram á sömu braut, styður við áframhaldandi uppbyggingu og gerir sveitarfélaginu kleift að bregðast við þörfum vaxandi samfélags.
