Forstöðumaður Miðstöðvar öldrunarþjónustu

Hlusta

Sveitarfélagið Stykkishólmur auglýsir eftir forstöðumanni í nýtt starf til þess að veita forstöðu og leiða stofnun nýs sviðs öldrunar og stoðþjónustu í sveitarfélaginu og innleiðingu á stefnumörkun starfshóps um þjónustu við einstaklinga 60 ára og eldri. Með stofnun miðstöðvarinnar er fyrsta skrefið tekið við að vinna markvisst að því að samþætta félags- og heilbrigðisþjónustu, þ.m.t. félagslegrar og heilbrigðislegrar heimaþjónustu, hvíldarinnlagna, félagsstarfs og fleiri þjónustuþætti eldra fólks.

Forstöðumaður stýrir nýrri miðstöð öldrunarþjónustu sem mun vera staðsett við Skólastíg 14 í Stykkishólmi. Um er að ræða 100% starfshlutfall. Starfið heyrir undir bæjarstjóra og undir sviðið heyra starfsmenn sveitarfélagsins sem koma til með að starfa hjá miðstöð öldrunarþjónustu.

Helstu verkefni og ábyrgð

Ábyrgð á stjórnun og rekstri stuðningsþjónustu í sveitarfélaginu skv. lögum um félagsþjónustu sveitarfélaga (heimaþjónustu o.fl.) Markmið stuðningsþjónustu er að aðstoða og þjálfa notendur sem þurfa aðstæðna sinna vegna á stuðningi að halda við athafnir daglegs lífs og/eða til þess að rjúfa félagslega einangrun og skal stefna að því að efla þjónustuþega til sjálfsbjargar og gera þeim kleift að búa sem lengst í heimahúsi.
Ábyrgð á stjórnun og rekstri félagsstarfs eldra fólks í samstarfi við tómstunda- og æskulýðsfulltrúa.
Ábyrgð á daglegum störfum í málaflokknum svo sem umsjón með umsóknarferlum, þjónustu, samskiptum við þjónustuþega og aðstandendur þeirra, markmiðasetningu og gæðastarfi fyrir málaflokkinn, innleiðingu stefnumótunar og þróun málaflokksins hjá sveitarfélaginu.
Ábyrgð á upplýsingamiðlun, fréttum, viðburðum og fræðslu ásamt samstarfi við ýmsa samstarfsaðila innan sveitarfélags og utan

Menntunar- og hæfniskröfur

Menntun sem nýtist í starfi.
Reynsla af starfi með öldruðum og/eða annarri félagsþjónustu æskileg.
Reynsla af rekstarstýringu, þjónustustjórnun og/eða annarri stjórnun og mannahaldi æskileg.
Góð íslenskukunnátta og hæfni í framsetningu á texta.
Dugnaður, stundvísi og samviskusemi.
Jákvæðni og góð hæfni í mannlegum samskiptum.
Hæfni til að innleiða stefnu, skilgreina árangurs- og gæðaviðmið og byggja upp liðsheild í teymum.
Metnaður, frumkvæði og sjálfstæði í vinnubrögðum

Umsóknarfrestur er til og með 6. mars 2023.

Nánari upplýsingar má einnig finna á alfred.is en þar má jafnframt senda inn umsókn um starfið.

Nánari upplýsingar um starfið veitir Jakob Björgvin Jakobsson, bæjarstjóri, í síma 433-8100 og Ríkharður Hrafnkelsson, launa- og mannauðsfulltrúi, í síma 433-8100 eða með því að senda tölvupóst á rikki@stykkisholmur.is.

Umsókninni skal fylgja greinargóð skýrsla um störf umsækjanda, menntun og reynslu sem varpað getur ljósi á færni hans til að sinna umræddu starfi.

Launakjör eru samkvæmt kjarasamningi Sambands íslenskra sveitarfélaga og viðkomandi stéttarfélags.

Áhugasamir einstaklingar, án tillits til kyns, eru hvattir til að sækja um.

Stykkishólmur stendur við Breiðafjörð á norðanverðu Snæfellsnesi og er bæjarstæðið einstaklega fallegt. Um 1.300 manns búa í Sveitarfélaginu Stykkishólmi en bærinn er í um tveggja klukkustunda akstursfjarlægð frá höfuðborgasvæðinu. Þjónustustig er gott í Stykkishólmi og státar sveitarfélagið af ríkulegu íþrótta- og tómstundastarfi fyrir fólk á öllum aldri og rótgrónum mennta- og menningarstofnunum.

Stykkishólmur