Bæjarstjórn unga fólksins

Bæjarstjórn unga fólksins telur að matarverð í mötuneyti Fjölbrautaskóla Snæfellinga sé of hátt og að maturinn skorti fjölbreytileika. Bæjarstjórn unga fólksins hvetur bæjarstjórn til þess að beita sér fyrir lækkun á verði máltíða til nemenda í Fjölbrautaskóla Snæfellinga og auknum fjölbreytileika í matarvali.

Bæjarstjórn unga fólksins hvetur bæjarstjórn Stykkishólms til að beita sér fyrir því að ferðum í skólaakstri Fjölbrautarskóla Snæfellinga verði fjölgað, m.a. til að auka valmöguleika nemenda til þess að komast heim, og að verð rútumiða verði lækkað.

Bæjarstjórn unga fólksins leggur til að nýtt gervigras verði sett á sparkvöllinn og að hafinn verði undirbúningur að lagningu tartans á hlaupabraut á íþróttavelli, en tartan mun koma til með að auka nýtingu allra bæjarbúa til heilsueflingar.

Bæjarstjórn unga fólksins vekur athygli á að gangstéttar í sveitarfélaginu geta skapað víða hættu og torveldað eldra fólki og fötluðum einstaklingum að nýta gangstéttar í sveitarfélaginu. Bæjarstjórn unga fólksins telur brýnt, sérstaklega í því ljósi, að flýta endurnýjun gangstétta í sveitarfélaginu.

Bæjarstjórn unga fólksins hvetur bæjarstjórn til þess að herða á uppbyggingu á þeim götum sveitarfélagsins sem eru holóttar og að þrýst verði á Vegagerðina að malbika Aðalgötu frá Bónus og út úr bænum sem fyrst.