Fréttasafn

Landsmót UMFÍ 50+ var haldið í Stykkishólmi dagana 23.-25. júní síðastliðna. Að sögn Gunnhildar Gunnarsdóttir, framkvæmdastjóra HSH, gekk framkvæmd móts og undirbúningur þess frábærlega. „Svona mót er ekki haldið nema með öflugum sjálfboðaliðum sem skiluðu sínu mjög vel. Fjöldi þátttakenda var yfirmeðallagi í ár, eða um 350 manns“ – segir Gunnhildur.

Landsmót 50+ er hafið í Stykkishólmi og fjöldi fólks mætt í bæinn. Þótt mótið sé að grunni hugsað fyrir fimmtuga og eldri geta allir 18 ára og eldri, sem áhuga hafa á keppnisíþróttum og vilja prófa nýjar greinar, keypt þátttökuarmband.

Viðburðarík helgi er framundan í Stykkishólmi og óhætt að gera ráð fyrir að margt verði um manninn þar sem Danskir dagar verða haldnir samhliða Landsmóti UMFÍ 50+ komandi helgi. Veðurspá er góð fyrir helgina og má því ætla að margir sæki tjaldsvæðið í Stykkishólmi heim næstu daga. Undanfarið hefur ýmis undirbúningur staðið yfir fyrir helgina og má þar á meðal nefna endurbætur og fjölgun á rafmagnstenglum á tjaldsvæðinu.

Unnið hefur verið að undirbúningi hundagerðis í Stykkishólmi undanfarin ár af hálfu sveitarfélagsins. Umræður um hundagerði voru til að mynda áberandi í umhverfisgöngum bæjarstjóra árin 2019 og 2021 og ljóst að mikill áhugi íbúa var fyrir slíku gerði. Í kjölfar samráðs við íbúa samþykkti bæjarstjórn staðsetningu fyrir hundagerði í Stellulundi, við aðkomuna að Arnarborg. Eftir að staðsetning og stærð lá fyrir var ljóst að ekki var um hefðbundið hundagerði að ræða heldur gróinn og myndarlegan hundagarð þar sem menn og hundar geta komið saman og notið góðra stunda saman í fallegu umhverfi.  Undanfarið hafa svo starfsmenn Þjónustumiðstöðvar unnið baki brotnu að því að girða fyrir hundagarðnn.  Svæðum fyrir lausagöngu hunda fer fjölgandi víða um land og þykir í dag sjálfsögð þjónusta við hundaeigendur í sveitarfélögum sem þar sem lausaganga hunda er óheimil. Með tilkomu svæðisins geta hundaeigendur í sveitarfélaginu og gestir sleppt hundum sínum lausum á öruggu svæði til að hitta aðra hunda og leika lausum hala. Hundagarðurinn Stellulundur er ríflega 3500 fermetrar að stærð og líklega sá stærsti á Vesturlandi og með þeim stærstu á landinu.

Vakin er athygli á því að Gámastöðin Snoppa verður lokuð laugardaginn 17. júní.

Umsóknir og breytingar á leikskólavistun í leikskólanum í Stykkishólmi fyrir næsta skólaár, verða að hafa borist í síðasta lagi 23. júní. Að öðrum kosti er ekki hægt að tryggja leikskóladvöl barna. Lögheimili og kennitala eru skilyrði nema samið hafi verið um annað.

"Við Hólmarar eigum öflugt íþrótta- og afreksfólk á öllum aldri og ég hef fulla trú að því að heimamenn láti til sín taka á mótinu."  - segir Magnús. Aðspurður út í veðurspá gerir Magnús ráð fyrir björtu veðri, hlýju og hæglætis vind landsmótshelgina, en Magnús hefur löngum þótt afar veðurglöggur.

Þjóðhátíðardagur íslendinga, 17. júní, verður haldinn hátíðlegur í Stykkishólmi venju samkvæmt. Hátíðardagskráin fer fram í Hólmgarðinum og hefst kl. 13:30 eða þegar skrúðgangan kemur arkandi frá Tónlistarskóla Stykkishólms þaðan sem hún leggur af stað kl. 13:00.

Í dag og gær hafa nokkrir vaskir menn á vegum verkefnisins unnið hörðum höndum að því að rampa upp við Lyfju, Arion banka, Kram og Hárstofuna og bæta þar með aðgengi að þessum fyrirtækjum. Búið er að ganga frá við Lyfju og Arion banka með myndarlegri hellulögn sem tryggir hreyfihömluðum gott aðgengi að þessum þjónustuaðilum. Verið er að leggja loka hönd á hellulögn við Kram og Hárstofuna.

Boðað er til fundar um ýmis málefni er varða skipulag og umhirðu kirkjugarða 7. júní 2023 kl. 17:00 í félagsheimilinu Breiðabliki í Eyja- og Miklaholtshreppi, og samvinnu sóknarnefnda/kirkjugarðsstjórna og sveitarfélaga. Vænst er fulltrúa allra kirkjugarða á Snæfellsnesi, fulltrúa sveitarfélaga og presta í prófastsdæminu. Gestir fundarins eru Guðmundur Rafn Sigurðsson framkvæmdastjóri Kirkjugarðaráðs og Smári Sigurðsson formaður Kirkjugarðasambandsins. Fundarstjóri er Kristín Þorleifsdóttir, sviðstjóri umhverfis- og skipulagssviðs.