Fréttasafn

Kjartan Jóhannes Karvelsson hefur verið ráðinn hafnarvörður við Stykkishólmshöfn, en alls bárust 6 umsóknir um starfið. Hrannar Pétursson hefur gengt starfi hafnarvarðar allt frá árinu 2005, en hann ætlar að breyta til og sagði því starfi sínu lausu á dögunum. Hrannari er þakkað kærlega fyrir gott og óeigingjarnt starf í þágu Stykkishólmsbæjar og óskað velfarnaðar í framtíðarstörfum.

Lóðin Áskinn 6 er auglýst til úthlutunar í samræmi við reglur Stykkishólmsbæjar um úthlutun á lóðum fyrir íbúðar- og atvinnuhúsnæði og bætist þar með á úthlutunarlista yfir lausar lóðir í Stykkishólmi. Umsóknarfrestur er 10 dagar, frá 27. apríl til og með 7. maí. Berist fleiri en ein umsókn að lokinni auglýsingu, þ.e. 7. apríl, og uppfylli þær skilyrði framangreindra úthlutunarreglna Stykkishólmsbæjar skal hlutkesti ráða úthlutun, en eftir þann tíma skal úthluta þeim til fyrsta umsækjanda sem eftir leitar að uppfylltum skilyrðum reglnanna.

Míla vinnur þessa dagana að lagningu ljósleiðara í Stykkishólmi. Í þessari atrennu verður lagður ljósleiðari í eftirfarandi götur: Ásklif, Áskinn, Neskinn, Nestún, Búðarnes, Hjallatangi 2-18, Borgarbraut, Borgarflöt, Garðaflöt, Víkurflöt Vallarflöt, Sjávarflöt og Laufásvegur.

Starfshópurinn leggur til aðgerðaáætlun þar sem tíundaðar eru 45 aðgerðir til að efla þjónustu við aldraða. Hópurinn leggur m.a. til að húsnæði að Skólastíg 14 verði nýtt sem þjónustukjarni fyrir eldra fólk, þar verði hannaðar íbúðir á efri og neðri hæð ásamt því að á neðri hæð verði sameiginlegt rými notað sem þjónustumiðstöð eldri borgara.

Ný viðbygging leikskólans hefur verið tekin í notkun. Í fyrsta sinn nú í morgun mættu foreldrar með börnin sín á nýja Bakka. Að sögn leikskólastjóra var ekki annað að sjá en börnin væru glöð með nýtt umhverfi enda búin að fylgjast grant með framvindu byggingarinnar undanfarna mánuði.

Starfshópur um eflingu atvinnulífs í Stykkishólmi, sem skipaður var af bæjarráði Stykkishólmsbæjar í ágúst 2021, hefur lokið störfum og skilað skýrslu til bæjarstjórnar. Í skýrslunni eru útlistaðar 20 tillögur atvinnulífi í Stykkishólmi til sóknar. Megintillaga starfshópsins er að stofnað verði Þekkingar- og rannsóknarsetur við Breiðafjörð.

Þriðjudaginn 10. maí nk. verður haldið opið íbúaþing um endurskoðun á skólastefnu Stykkishólmsbæjar. Starfshópur um endurskoðun á skólastefnu Stykkishólmsbæjar stendur fyrir íbúaþinginu þar sem tekið verður samtal um stefnuna og íbúum gefin kostur á því að láta skoðanir sínar í ljós.

Í tilefni kokteilhátíðar mun Norska húsið halda kokteilboð og tónleika í Stáss stofunni föstudaginn 15. apríl kl. 17:00-18:00.

Þann 30. mars síðastliðinn, samþykkti bæjarstjórn Stykkishólmsbæjar að auglýsa tillögu að breytingu á deiliskipulagi fyrir Víkurhverfi skv. 1. mgr. 41. gr. skipulagslaga nr. 123/2010. Svæðið sem breytingin nær til er 2,3 ha að stærð og nær til miðhluta hverfisins norður af Borgarbraut. Deiliskipulagsbreytingin er tilkomin vegna mikillar jarðvegsdýptar á hluta svæðisins og þörf fyrir fjölgun lóða annarstaðar. Markmiðið er einnig að stuðla að betri landnýtingu, þétta byggð með fjölgun minni lóða, auka fjölbreytileika íbúðareininga, auka skjólmyndun, fegra yfirbragð hverfisins, bæta við vistgötum og tryggja gott aðgengi að verslun, þjónustu, leik- og útivistarsvæðum.

Fimmtudaginn 14. apríl kl. 15:30 opnar í Norska húsinu myndlistarsýningin - Is it inside my body ~ or is it outside eftir Söru Gillies.