Fréttir

Íslenskunámskeið fer fram í Stykkishólmi á vegum Símenntunarmiðstöðvar Vesturlands. Námskeiðið hefst 27. mars og er ætlað fullorðum einstaklingum sem eru að byrja að læra íslensku sem annað tungumál.

Júlíana - hátíð sögu og bóka var sett við formlega opnunarhátíð í Stykkishólmskirkju í gær en hátíðin er nú haldin í tíunda sinn. Frá því hátíðin hófst árið 2013 hefur Hólmari verið heiðraður fyrir framlag til menningar- og framfaramála. Á opnunarhátíðinni í gær var Sturla Böðvarsson heiðraður fyrir framlag sitt til minjaverndar, skipulags- og samgöngumála í Stykkishólmi.

Lóðirnar Austurgata 6A og Aðalgata 5A eru hér með auglýstar til úthlutunar í samræmi við reglur sveitarfélagsins um úthlutun á lóðum fyrir íbúðar- og atvinnuhúsnæði og bætast þar með á úthlutunarlista yfir lausar lóðir í Stykkishólmi. Umsóknarfrestur er til og með 3. apríl 2023.

Samkvæmt sorphirðudagatali ætti að losa almennt og lífrænt sorp miðvikudaginn 5. apríl nk. Starfsmenn Gámafélagsins koma hins vegar snemma til byggða í apríl og ætla að byrja að losa íbúa við almennt og lífrænt sorp deginum áður, þriðjudaginn 4. apríl. Íbúum sem sníða venjur sínar eftir sorphiðudagatali Gámafélagsins er því bent á að snjallt væri að tæma lífrænu- og almennuílátin innanhús út í tunnu að kveldi mánudagsins eða snemma á þriðjudeginum.

Sveitarfélagið Stykkishólmur auglýsir eftir starfsfólki í Þjónustumiðstöð, flokkstjórum og aðstoðar- og stuðningsfólk við sumarnámskeið sumarið 2023. Flokkstjórar stjórna daglegu starfi vinnuflokka skólans og stuðla að reglusemi, ástundun og góðri umgengni starfsmanna. Flokkstjórar vinna með unglingunum og sýna þeim hvernig staðið skuli að verki og leiðbeina um notkun á áhöldum og tækjum.

Laugardaginn 25. mars kl. 17:00 opnar í Norska húsinu - Byggðasafni Snæfellinga og Hnappdæla ljósmyndasýningin - Fuglar á Snæfellsnesi eftir Daníel Bergmann. Daníel Bergmann náttúruljósmyndari hefur lengi fylgst með fuglalífinu á Snæfellsnesi og myndað fuglana sem má finna á nesinu, bæði þá algengu og sjaldséðu. Á sýningunni eru myndir af nokkrum þessara fuglategunda ásamt ýmiss konar upplýsandi fróðleik um tilveru þeirra á Snæfellsnesi. Það er vel við hæfi að gefa fuglunum gaum um þetta leyti árs því nú gengur brátt í garð varptími sumra staðfugla og farfuglarnir byrja að streyma til landsins í apríl.

Í gær, mánudaginn 20. mars, kom Alma Möller landlæknir í Stykkishólm og ritaði fyrir hönd Embættis landlæknis undir samning við sveitarfélagið um þátttöku þess í verkefninu Heilsueflandi samfélag. Góð mæting var í íþróttahúsið þegar undirskriftin fór fram. Bæjarstjóri flutti ávarp og landlæknir kynnti verkefnið. Í ávarpi bæjarstjóra kom fram að með undirritun samningsins væri í raun verið að formfesta eitthvað sem Stykkishólmur hefur verið um árabil, þ.e. heilsueflandi samfélag. Bæjarstjóri fór stuttlega yfir íþróttasögu sveitarfélagsins og uppbyggingu þeirra góðu innviða sem Hólmarar og Helgfellingar búa við.

Fimmtudaginn 16. mars sl. fór fram söngkeppni SamVest 2023 í Dalbúð, Búðardal. Tvö atriði kepptu fyrir hönd Félagsmiðstöðvarinnar X-ið. Melkorka Líf Jónsdóttir söng lagið All of me eftir John Legend og hljómsveitin Hallgerður og rest en þau fluttu Bond lagið Skyfall eftir Adele.

Í liðinni viku stóðu yfir töluverðar framkvæmdir á hafnarsvæðinu í Stykkishólmi. Vegagerðin stendur fyrir framkvæmdunum sem snúa að því að bæta grjóti í hafnarbarðið og tryggja öryggi á svæðinu.

Aðalfundur Krabbameinsfélags Snæfellsness verður haldinn í Samkomuhúsi Grundarfjarðar sunnudaginn 19. mars 2023 kl. 20:00. Öll velkomin.