Fréttir

Á fjórða tug samtaka kvenna, hinsegin fólks og launafólks blása til heils dags kvennaverkfalls næstkomandi þriðjudag. Konur og kvár sem geta munu þá leggja niður störf. Sveitarfélagið Stykkishólmur tekur undir þau meginmarkmið kvennaverkfalls að hefðbundin kvennastörf, jafnt launuð sem ólaunuð, skuli meta að verðleikum. Það er jafnframt ekkert launungarmál að starfsemi sveitarfélagsins skerðist verulega án vinnuframlags kvenna. Sveitarfélagið mun ekki draga af launum starfsfólks sem tekur þátt í kvennaverkfallinu í samráði við sinn stjórnanda.

Félags- og skólaþjónusta Snæfellinga auglýsir laust til umsóknar starf í Ásbyrgi, vinnu- og hæfingarstöð fatlaðs fólks í Stykkishólmi. Konur eru sérstaklega hvattar til að sækja um starfið þar sem hallar á jöfnun kynjahlutalls í starfsliði Ásbyrgis.

Á síðasta ári fór hundahreinsun fram með nýju sniði í fyrsta sinn í Stykkishólmi. Fyrirkomulagið gekk vel og verður hreinsunin því með sama sniði í ár. Í stað þess að boða alla hunda í hreinsun sama dag mun Dýralæknamiðstöð Vesturlands hafa samband við eigendur skráðra hunda og bjóða þeim að bóka stuttan tíma. Auk hundahreinsunar yrði þá boðið upp á snögga heilsufarsskoðun og hundaeigendum gefst tækifæri til að spyrja spurninga og fá ráðgjöf varðandi sína hunda ef þess þarf.

Öldrunarmiðstöð er ný þjónustu- og félagsmiðstöð í Stykkishólmi sem hefur að markmiði að sameina öldrunar- og velferðarþjónustu sveitarfélagsins undir einn hatt á einum stað. Leitað er eftir starfsfólki í heimaþjónustu, heimilisþrif og félagslega stuðningsþjónustu. Einnig vantar starfsfólk til starfa við þrif á sameign, í þvottahús, ígrip í eldhúsi ofl.

Síðastliðinn sunnudag bauð Miðstöð öldrunarþjónustu til grillveislu að Skólastíg 14. Veislan heppnaðist vel og var margt um manninn. Í veislunni var nafnasamkeppni fyrir miðstöðina sett í loftið sem stendur opin til og með næsta sunnudags, 15. október. Hvað viljum við kalla þjónustu- og félagsmiðstöðina sem hér verður mótuð og starfrækt í þeim tilgangi að gott sé að eldast í sveitarfélaginu Stykkishólmi?

Helga Guðjónsdóttir, atvinnuráðgjafi, og Sigursteinn Sigurðsson, menningarfulltrúi, verða með opnar skrifstofur á Snæfellsnesi 12. október næstkomandi. Áhugasömum er bent á að nýta sér þjónustu þeirra en þau verða á eftirfarandi stöðum: Ráðhúsið í Stykkishólmi kl. 10:00 - 12:00 Ráðhúsið í Grundarfirði kl. 13:00 - 15:00 Röstin Hellissandi kl. 15:30 - 17:30

Deiliskipulag fyrir hafnarsvæðið við Skipavík tók gildi með birtingu auglýsingar í B-deild Stjórnartíðinda 2. október. Deiliskipulagið hefur hlotið meðferð í samræmi við 41. gr. og 42. gr. skipulagslaga nr. 123/2010. Bæjarstjórn Sveitarfélagsins Stykkishólms samþykkti þann 18. apríl 2023 að auglýsa tillögu að deiliskipulagi í samræmi við 1. mgr. 41. gr. skipulagslaga nr. 123/2010 og var hún auglýst 26. apríl 2023 með athugasemdafrest til og með 9. júní 2023. Opinn kynningarfundur var haldinn í Amtbókasafni Stykkishólms 24. maí. Með afgreiðslubréfi þann 17. ágúst sl., gerði Skipulagsstofnun minniháttar athugasemdir við skipulagstillöguna og var hún uppfært í samræmi við það. Stofnunin afgreiddi skipulagstillöguna án frekari athugasemda þann 22. september sl.

Á vefsíðu sveitarfélagsins Stykkishólms má lesa helstu fréttir sem snúa að rekstri sveitarfélagsins, viðburðum og öðru tengdu sveitarfélaginu. Fréttunum er svo deilt á facebooksíðu Stykkishólms til að ná athygli sem flestra. Fréttaritið Helstu fréttir er samantekt af því sem hæst ber í fréttum frá sveitarfélaginu. Blaðinu er ætlað að bæta upplýsingaflæði frá sveitarfélaginu og ná til þeirra sem ekki nota tölvur, sér í lagi eldra fólks. Blaðið liggur því frammi á Miðstöð öldrunarþjónustu, Skólastíg 14 Stykkishólmi. Áhugasömum er bent á að næla sér í eintak þar.

Sunnudaginn 8. október býður Miðstöð öldrunarþjónustu til grillveislu að Skólastíg 14. Veislan stendur frá kl. 12 - 17 og eru allir hjartanlega velkomnir. Boðið verður uppá skemmtiatriði auk þess sem nafnasamkeppni fyrir miðstöð öldrunarþjónustu verður sett í loftið.  Athugið að nauðsynlegt er að skrá sig á skráningarblaði á Skólastíg 14 eða á link hér að neðan í síðasta lagi mánudaginn 2. október

17. fundur bæjarstjórnar Stykkishólms fer fram fimmtudaginn 28. september kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.