Fréttasafn

Íþrótta- og Ólympíusamband Íslands í samstarfi við Sundsamband Íslands stendur fyrir landsátaki í sundi frá 1. - 30. nóvember 2024. Syndum er heilsu- og hvatningarátak sem höfðar til allra landsmanna. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess. Á síðasta ári syntu þátttakendur samtals 26.862,93 km, eða rúmlega 20 hringi í kringum landið.

29. fundur bæjarstjórnar Stykkishólms fer fram fimmtudaginn 31. október kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Undanfarin ár hefur hundahreinsun farið fram með nýju sniði í Stykkishólmi. Fyrirkomulagið hefur mælst vel fyrir og verður hreinsunin því með sama sniði í ár. Í stað þess að boða alla hunda í hreinsun sama dag mun Dýralæknamiðstöð Vesturlands hafa samband við eigendur skráðra hunda og bjóða þeim að bóka stuttan tíma. Auk hundahreinsunar er boðið upp á snögga heilsufarsskoðun og hundaeigendum gefst tækifæri til að spyrja spurninga og fá ráðgjöf varðandi sína hunda ef þörf er á.

Nú þegar skammdegið færist yfir er gott að huga að sýnileika og draga fram endurskinsmerkin, jafnt börn sem fullorðnir. Með því að gera sig sýnilega með endurskinsmerkum auka gangandi og hjólandi vegfarendur eigið öryggi. Ökumenn sjá þá vegfarendur fyrr og eru því líklegri til að stoppa þegar þörf er á, eða eins og daninn segir gjarnan Lys op for stop!

Hólmarar þjófstarta gleðinni þetta árið með hrekkjavökugöngu mánudaginn 28. október. Fjölskyldur og vinir eru hvattir til að ganga í hús á eigin forsendum milli kl. 17:30 og 19:30 þar sem börn safna sér sælgæti, eins og þekkt er. Gengið verður út frá þeirri reglu að banka megi uppá þar sem hús hafa verið merkt eða skreytt við eða á hurðina með skýrum hætti í tilefni Hrekkjavökunnar.

Sveitarfélagið Stykkishólmur auglýsir lóðina Imbuvík 4  í Víkurhverfi lausa til úthlutunar með 30% afslætti af gatnagerðagjöldum, sem miðast við mögulegt byggingarmagn, vegna forsendubrest í tengslum við fyrirliggjandi óhagkvæmni tengt uppbyggingu lóðarinnar. Lóðin er auglýst í samræmi við reglur Stykkishólms um úthlutun á lóða fyrir íbúðar- og atvinnuhúsnæði og bætist lóðin þar með á úthlutunarlista yfir lausar lóðir í Stykkishólmi. Umsóknarfrestur er til og með 4. nóvember 2024. Gatnagerð á svæðinu er á lokastigi.

Menningarhátíðin Norðurljósin er haldin í sjöunda sinn í Stykkishólmi nú um helgina. Hrafnhildur Hallvarðsdóttir, forseti bæjarstjórnar setti hátíðina á opnunartónleikum sem fram fóru í Stykkishólmskirkju í gær, fimmtudag, en þar var boðið til sannkallaðrar söngveislu að hætti Hólmfríðar Friðjónsdóttur. Fram komu þrír kórar; Karlakórinn Heiðbjört, Kvennasveitin Skaði og Söngsveitin Blær en einnig komu fram Lárus Ástmar Hannesson, Halla Dís Hallfreðsdóttir og Hólmfríður sjálf. Um undirleik sáu þeir Lázsló Petö, Hólmgeir S.Þórsteinsson, Haukur Garðarsson og Martin Markvoll.

Menningarhátíðin Norðurljósin verður haldin í sjöunda sinn í Stykkishólmi dagana 24.-27. október.  Hátíðin var fyrst haldin árið 2010 og hefur verið haldin annað hvert ár síðan. Dagskráin í ár verður þéttskipuð og fjölbreytt en lagt er upp úr því að allir geti fundið eitthvað við sitt hæfi. Opnunarhátíð verður í Stykkishólmskirkju á fimmtudagskvöldinu. Yfir helgina verða m.a. tónleikar í Vatnasafninu, Norðurljósabingó, opnar vinnustofur, sýningar á ýmsum stöðum og söguganga. Erindi verða haldin bæði í Norska húsinu og í Vatnasafninu.

Vinna við gerð fjárhagsáætlunar sveitarfélagsins stendur nú yfir og er íbúum gefin kostur á að skila inn ábendingum og tillögum vegna þessa og hafa með því móti tækifæri til að hafa áhrif á aðgerðir bæjarstjórnar.

Krabbameinsfélag Snæfellsness býður til samveru og viðburðar miðvikudaginn 23. október kl. 20:00 í Sögumiðstöðinni í Grundarfirði.