Fréttasafn

Á Þorláksmessu, 23. desember, kl. 18.00 verður gengið til friðar frá Hólmgarði niður á Pláss. Níundi bekkur selur rafkerti við upphaf göngu í fjáröflunarskyni. Fyrir ári síðan var hefðbundnum kyndlum skipt út fyrir rafkerti og var almenn ánægja með þá breytingu, en rafkertin er hægt að taka með heim og nýta þar. Auk þess selur níundi bekkur heitt súkkulaði á plássinu að lokinni göngu. Þá verður einnig veitt viðurkenning fyrir fallega skreytt hús. Nemendur níunda bekkjar sáu um valið.

Í dag, þriðjudaginn 19.desember, kl. 18:00 verða haldnir hátíðartónleikar Tónlistarskóla Stykkishólms í Stykkishólmskirkju. Nemendur allra kennara sýna afrakstur annarinnar og efnisskráin því fjölbreytt og jólaleg.

Veitur sendu frá sér tilkynningu rétt í þessu þar sem fram kemur að vegna rafmagnsleysis hjá Rarik verði heitavatnslaust í Stykkishólmi í dag frá klukkan 11:00 til kukkan 16:00. Á meðan þessi staða er uppi er ekki unnt að hafa sundlaugina opna og verður hún því lokuð á meðan lokað er fyrir heita vatnið.

Opnað hefur verið fyrir umsóknir í lista- og menningarsjóð Stykkishólms. Samkvæmt reglum um styrkveitingar er hlutverk sjóðsins meðal annars að: Styðja og styrkja lista og menningarstarf í Stykkishólmi og hvetja til nýsköpunar á sviði lista og menningar er tengjast Stykkishólmi. Styðja við útgáfustarfsemi er varðar sögu, menningu og atvinnuhætti bæjarins. Styðja við varðveislu menningarminja.

Opnir kynningarfundir verða í Amtbókasafninu í Stykkishólmi þriðjudaginn 19. desember kl. 17 fyrir Þingskálanes og kl. 18 fyrir Víkurhverfi. Þann 30. nóvember sl. samþykkti bæjarstjórn Sveitarfélagsins Stykkishólms að auglýsa eftirfarandi skipulagstillögur: Þingskálanes, Gæsatangi og Hamrar - Nýtt deiliskipulag og Víkurhverfi - Breyting á deiliskipulagi.

20. fundur bæjarstjórnar Stykkishólms fer fram fimmtudaginn 14. desember kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Jólasveinaratleikurinn góði er hafinn. Líkt og í fyrra hefur Þjónustumiðstöðin með Jóni Beck, verkstjóra, í broddi fylkingar sett upp jólasveinaratleik til að stytta börnum og fjölskyldufólki stundir á aðventunni. Um er að ræða skemmtilega viðbót í jólaskreytingar bæjarins þar sem tækifæri gefst til að arka um Stykkishólm og leita að jólasveinunum sem eru í ýmsum erindagjörðum fyrir jólin og munu birtast hér og þar um bæinn, einn af öðrum. Ratleikurinn hefst í dag, þriðjudaginn 12. desember með komu Stekkjastaurs samkvæmt gamalli hefð og endar með komu Kertasníkis á Aðfangadag 24. desember.

Boðað er til samtalsfundar mánudaginn 11. desember um fjárhagsáætlun Stykkishólms fyrir tímabilið 2024-2027 þar sem bæjarstjóri mun í samtali við viðstadda gera grein fyrir markmiðum fjárhagsáætlunar og helstu áherslum.

Útskriftarhátíð Fjölbrautaskóla Snæfellinga verður haldin miðvikudaginn 20. desember í hátíðarsal skólans í Grundarfirði. Hátíðin hefst kl.14:00 og að henni lokinni verða kaffiveitingar í boði skólans. Allir velunnarar skólans eru velkomnir.

Miðvikudaginn 27. september síðastliðinn var verksamningur vegna Víkurhverfis undirritaður. Samningsaðilar eru Sveitarfélagið Stykkishólmur, Veitur ofh., Míla hf., Rarik ohf. sem saman eru verkkaupar og kaupa vinnu af BB og Synir ehf. en BB var eina fyrirtækið sem bauð í verkið. Fyrsta tilboði var þó hafnað þar sem tilboðið var 30,5% yfir kostnaðaráætlun. Á grundvelli viðræðna lagði BB fram endurskoðað tilboð, sem var 15,7% yfir kostnaðaráætlun en því var jafnframt hafnað. Frekari viðræður aðila leiddu til þess að BB lagði fram nýtt tilboð sem var 5,4% yfir kostnaðaráætlun og var gengist við því.