Framtíðaráform Vatnasafns

Safna- menningarmálanefnd leggur áherslu á verðmæti safnsins og gildi þess í menningarlegu samhengi. Þá telur nefndin möguleika á því að nýta íbúðina í safninu til útleigu til listamanna.

Safna- og menningarmálanefnd tekur vel í þá hugmynd að hitta James Lingwood á næsta fundi nefndarinnar í gegnum fjarfundarbúnað.

Á fund nefndarinnar mættu James Lingwood og Fríða Björk Ingvarsdóttir, fulltrúar Artangels, til að ræða um samning Artangels og Stykkishólmsbæjar. Lýstu þau yfir vilja félagsins til þess að ræða framlengingu á samningnum í einhverju formi. Umræðan snérist um breytingar á fyrirkomulagi samkomulagsins og mikilvægi þess að næstu skref verði tekin í samráði við íbúa. Nefndin tekur jákvætt í að taka samtalið við Artangel áfram og stefnir á að ræða málið betur á fundi nefndarinnar.

Safna- og menningarmálanefnd vísar málinu til frekari vinnslu í nefndinni.

Safna- og menningarmálanefnd sér ríkan hag Stykkishólmsbæjar í því að halda starfsemi Vatnasafns í bænum og hvetur bæjarstjórn til að leita lausna í samvinnu við Artangel til að tryggja að svo verði. Nefndin vísar málinu til vinnslu í bæjarráði.

Bæjarstjóri gerði grein fyrir málinu og honum falið að vinna málið áfram.

Bæjarráð samþykkir tillögu bæjarstjóra um að skipaður verði þriggja manna vinnuhópur um framtíðaráform Vatnasafns og að vinnuhópinn skipi tveir fulltrúar aðalmanna í bæjarráði, einn frá hvorum lista, ásamt formanni safna- og menningarmálanefndar.

Bæjarstjórn samþykkir afgreiðslu bæjarráðs.

Bæjarstjórn samþykkir að skipa Hrafnhildi Hallvarðsdóttur (formann) og Ragnar Má Ragnarsson, ásamt Viktoríu Líf Ingibergsdóttur, í vinnuhóp um framtíðaráform Vatnasafns.

Safna- og menningarmálanefnd lýsir yfir vilja og áhuga til þess að ná samningi um framtíð Vatnasafns í Stykkishólmi. Safna og menningarmálanefnd leggur í því sambandi þunga áherslu á mikilvægi þess að sveitarfélagið fái stuðning til uppbyggingar menningarinnviða í samræmi við fyrirliggjandi gögn, enda mun slíkur stuðningur skipta sköpum þegar kemur að því að koma til móts við sveitarfélagið vegna þeirra löngu skuldbindinga sem felast í fyrirliggjandi samningi um Vatnasafn. Safna- og menningarmálanefnd tekur að öðru leyti undir minnisblað bæjarstjóra, minnisblað verkefnastjóra menningarmála Vesturlands og fundargerð vinnuhóps um framtíðarform Vatnasafns.

Bæjarráð samþykkir afgreiðslu safna-og menningarnefndar.

Bæjarráð vísar framangreindri afgreiðslu til frekari vinnslu í vinnuhóp um framtíð Vatnasafns.

Lagt fram til kynningar.

Safna- og menningarmálanefnd þakkar fyrir framlagðar upplýsingar, þar á meðal minnisblað bæjarstjóra, drög að nýjum samningi um Vatnasafnið og minnisblað verkefnastjóra menningarmála á Vesturlandi. Nefndin telur að framangreind gögn varpi skýru ljósi á bæði menningarlegt gildi Vatnasafnsins og þau umfangsmiklu fjárhagslegu og rekstrarlegu verkefni sem tengjast framtíð safnsins.

Nefndin ítrekar fyrri afstöðu sína, líkt og fram kom á 4. fundi nefndarinnar, um að mikilvægt sé að ná samningi um framtíð Vatnasafnsins í Stykkishólmi. Í því samhengi leggur nefndin þunga áherslu á að sveitarfélagið fái viðeigandi stuðning til uppbyggingar menningarinnviða og til að mæta þeim langtímasamningsskuldbindingum sem fram koma í nýjum samningsdrögum.

Nefndin tekur undir þau sjónarmið sem fram koma í minnisblaði bæjarstjóra um að utanaðkomandi fjármögnun sé nauðsynleg forsenda þess að unnt sé að gera bindandi samning til lengri tíma. Nefndin tekur jafnframt undir að tækifæri til að efla menningartengda ferðaþjónustu og samfélagslega virkni safnsins séu veruleg og vægi þess innan samtímalistar er ómetanlegt, en að viðhaldsþörf húseignarinnar og listaverksins kalli á aðkomu ríkisins, líkt og rakið er í framlögðum gögnum.

Safna- og menningarmálanefnd hvetur til þess að vinnuhópur um framtíð Vatnasafns fundi með annars vegar fulltrúum ríkisins og hins vegar fulltrúum listamannsins til að fara yfir stöðu málsins. Með vísan til framangreinds samþykkir nefndin að vísa málinu áfram til frekari vinnu í vinnuhópi um framtíð Vatnasafns og óskar eftir að næstu skref í samningsgerð verði lögð fyrir nefndina þegar þau liggja fyrir.