Fréttir

Föstudagskvöldið 25. nóvember mætir KK í Hólminn og spilar öll sín bestu lög í Vatnasafninu. Ókeypis aðgangur er að tónleikunum en fjöldi gesta takmarkast við 70. Vegna takmarkaðs sætafjölda er nauðsynlegt að panta á tónleikana. Pöntun fer fram á netfanginu vatnasafn@gmail.com.

Lúðrasveit Stykkishólms heldur hausttónleika fimmtudaginn 24.nóvember nk. í Stykkishólmskirkju kl. 18:00. Fram koma: Litla Lúðró, Gemlingasveit, Stóra Lúðró og Víkingasveitin. Stjórnendur eru: Anastasia Kiahidi og Martin Markvoll

Líkt og undanfarin ár gefst íbúum nú kostur á því að velja jólatré í Hólmgarðinn. Valið stendur í ár á milli stafafuru sem stendur í Sauraskógi og Sitkagrenis úr garðinum hjá Kristjóni Daðasyni.

Í dag, 18. nóvember, heldur LED-væðing götuljósa í Stykkishólmi áfram. Byrjað verður á að endurnýja ljós á flötunum og í framhaldi verður skipt um hausa á stærstu staurunum í bænum. Samhliða því verður gert við bilaða staura.

Bæjarstjórn sameinaðs sveitarfélags Stykkishólmsbæjar og Helgafellssveitar hefur samþykkt að auglýsa skipulagslýsingu fyrir breytingu á Aðalskipulagi Stykkishólms 2002-2022 og tillögur að nýjum deiliskipulagsáætlunum fyrir grænan iðngarð við Kallhamar og stækkun athafnasvæðis við Hamraenda.

Í tilefni af 30 ára afmæli Háls- og bakdeildarinnar í Stykkishólmi býður Heilbrigðisstofnun Vesturlands gestum og gangandi að líta við í dag, kynnast starfseminni og þiggja léttar veitingar.

Sameiginlegt umhverfis- og skipulagssvið Stykkishólmsbæjar og Helgafellssveitar, Grundarfjarðarbæjar og Eyja- og Miklaholtshrepps leitar að kraftmiklum byggingarfulltrúa til að halda utan um byggingarmál og verklegar framkvæmdir í sveitarfélögunum þremur. Á sviðinu er lögð áhersla á vandað faglegt starf og þróun, öflugt samstarf og góða þjónustu. Byggingarfulltrúi starfar náið með skipulagsfulltrúa, sem jafnframt er sviðsstjóri umhverfis- og skipulagssviðs og næsti yfirmaður byggingarfulltrúa. Starfsaðstaða er í Ráðhúsunum í Stykkishólmi og Grundarfirði en auk þess kallar starfið á ferðir og fundi í Eyja- og Miklaholtshreppi, en um hálftíma akstur er milli þessara staða. 

Tryggingastofnun býður til fræðslufundar um umsóknir um ellilífeyrir hjá TR, miðvikudaginn 9. nóvember nk. kl.16.00 – 17.30 í Hlíðasmára 11, Kópavogi. Fundinum einnig streymt. Á fundinum verður farið yfir hvernig best er að standa að umsókn til TR um ellilífeyri, hvaða gögn þurfa að fylgja umsókn, réttindi og upphæðir greiðslna.

Íþrótta- og Ólympíusamband Íslands í samstarfi við Sundsamband Íslands stendur fyrir landsátaki í sundi frá 1. - 30. nóvember 2022. Syndum er heilsu- og hvatningarátak sem höfðar til allra landsmanna. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess.

Foreldrafélag Grunnskólans í Stykkishólmi stendur fyrir hrekkjavökugöngu og opnun á Húsi hinna framliðnu (Haunted house) fyrir þá sem þora miðvikudaginn 2. nóvember. Verkefnið vinnur foreldrafélagið í samstarfi við ungmenni í félagsmiðstöðinni og Norska húsið.