Samkomuhúsið í Stykkishólmi við Aðalgötu 6

Safna- menningarmálanefnd er sammála um að menningarlegt gildi hússins er ótvírætt og leggur til að sótt verði um styrki til að endurgera það og bæta svo sómi sé af.

Málinu vísað til næsta bæjarráðsfundar.

Atvinnu- og nýsköpunarnefnd hvetur Stykkishólmsbæ til þess að kanna hvort einkaaðilar séu fáanlegir til að vinna að uppbyggingu húsnæðisins til eflingar atvinnulífs í Stykkishólmi. Vandað verði til verka við endurbyggingu húsnæðisins með þeim skilmálum og kröfum sem bærinn setur í samræmi við fyrirliggjandi aðaluppdrætti og skýrslu frá Glámu-Kím.

Bæjarráð felur bæjarstjóra að afla heilbrigðisúttektar á Aðalgötu 6.

Bæjarstjóri gerir grein fyrir hugmynd um stofnun hollvinasamtaka um Samkomuhúsið í Stykkishólmi. Bæjarráð tekur jákvætt í að virkja samtakamátt samfélagsins til uppbyggingar á samkomuhúsinu og vísar málinu til frekari vinnslu í bæjarráði.

Bæjarráð samþykkir tillögu bæjarstjóra.

Safna- og menningarmálanefnd felur Jóni Ragnari Daðasyni að útfæra hugmyndir um næstu skref að uppbyggingu húsnæðisins og leggja fyrir safna- og menningarmálanefnd.

Jón Ragnar gerir grein fyrir verkefninu.

---

Anna Melsteð óskar eftir að koma að athugasemdum við fundargerð síðasta fundar safna- og menningarmálanefndar, hvað þennan dagskrálið, varðar með eftirfarandi bókun:

Í fundarboði 4. fundar safna- og menningarmálanefndar var á dagskrá að ræða málefni Samkomuhússins á Aðalgötu. Á fundinum sem haldinn var 01.07.2024, var ákveðið að fresta umræðum um Samkomuhúsið bæði vegna tímaskorts og að nefndarmaðurinn Jón Ragnar Daðason forfallaðist og sat því ekki fundinn. Þrátt fyrir það er ritað í fundargerð fundarins eftirfarandi:

8. Samkomuhúsið í Stykkishólmi Aðalgötu 6 #2006020
Umræður um samkomuhúsið í Stykkishólmi, framtíðarhorfur og hugmyndir um uppbyggingu.
Bókun:
Safna- og menningarmálanefnd felur Jóni Ragnari Daðasyni að útfæra hugmyndir um næstu skref að uppbyggingu húsnæðisins og leggja fyrir safna- og menningarmálanefnd.

Ég, Anna Melsteð, sem nefndarmanneskja gerði athugasemd við fundargerð sem birt var á vef sveitarfélagsins til formanns nefndarinnar og benti á að umræðum hefði verið frestað og laga þyrfti fundargerðina í samræmi við það. Formaður svaraði því til að hún myndi sjá til þess að leiðrétting yrði gerð. Í fundarboði fyrir 5. fund nefndarinnar er vísað í dagskrá til afgreiðslu nefndarinnar á 4. fundi hennar svohljóðandi: „Á 4. fundi sínum fól safna- og menningarmálanefnd Jóni Ragnari Daðasyni að útfæra hugmyndir um næstu skref að uppbyggingu húsnæðisins og leggja fyrir safna- og menningarmálanefnd. Jón Ragnar gerir grein fyrir stöðu málsins.“ Við fulltrúar Í-lista gerum alvarlega athugasemd við þessi vinnubrögð og treystum því að afgreiðslur sem birtast í fundargerðum hér eftir verði í samræmi við umræður á fundum nefndarinnar.

Anna Melsteð
Gísli Sveinn Gretarsson

---

Í ljósi bókunar Í-lista tekur bæjarstjóri fram að hann hafi setið síðasta fund og þar hafi afgreiðslan verið lesin upp og væntanlega er því um einfaldan misskilning að ræða þar sem engin virðist vera andsnúin afgreiðslunni efnislega, en í ljósi þessarar óvissu og í ljósi bókunar Í-lista leggur bæjarstjóri til eftirfarandi tillögu:

Safna- og menningarmálanefnd staðfestir afgreiðslu 8. dagskrárliðar 4. fundar safna- og menningarmálanefndar þar sem Jóni Ragnari Daðasyni var falið að útfæra hugmyndir um næstu skref að uppbyggingu húsnæðisins og leggja fyrir safna- og menningarmálanefnd.

Safna- og menningarmálanefnd samþykkir tillögu bæjarstjóra samhljóða.

Afgreiðsla safna- og menningarmálanefndar samþykkt.

Safna- og menningarmálanefnd þakkar fyrir framlagðar upplýsingar, þar á meðal endurgerðaráætlun Glámu-Kím frá 2014 og minnisblað bæjarstjóra um stöðu, ástand og mögulegar leiðir varðandi framtíð Samkomuhússins við Aðalgötu 6.

Nefndin tekur undir þau sjónarmið sem fram koma í báðum gögnum um að húsnæðið sé mikilvægar menningarminjar, lykilhluti bæjarmyndarinnar og hafi ríka sögulega og félagslega þýðingu fyrir Hólmara. Nefndin telur jafnframt ljóst af framlögðum gögnum að húsið þarfnist gagngerra endurbóta á næstu árum til að tryggja varðveislu þess og möguleika á áframhaldandi notkun.

Nefndin leggur áherslu á að unnið verði áfram að undirbúningi styrkumsókna til húsafriðunarsjóðs og annarra viðeigandi sjóða, í samræmi við hvatningu Minjastofnunar, og að uppfærðar kostnaðaráætlanir og fjármögnunarleiðir verði unnin á grundvelli fyrirliggjandi teikninga og ástandsgreininga.

Með vísan til þeirra valkosta sem raktir eru í fyrirliggjandi gögnum telur nefndin jafnframt mikilvægt að opnað verði á þann möguleika að selja eða framselja húsið, verði ekki unnt að tryggja fullnægjandi fjármögnun til endurbóta á næstu árum. Slíkur valkostur kæmi þó einungis til greina með þeim skilyrðum og/eða kvöðum að endurgerð fari fram í samræmi við fyrirliggjandi hönnunargögn og að allar helstu breytingar verði háðar samþykki sveitarfélagsins. Þá telur nefndin jafnframt mikilvægt að framtíðarnotkun hússins verði höfð að leiðarljósi við sölu húsnæðisins þannig að tryggt verði, eftir atvikum með kvöðum, að húsnæðið geti áfram nýst að einhverju marki undir menningarstarfsemi. Í þessu sambandi er mikilvægt að horfa til annarra sambærilegra fordæma sem liggja fyrir annars staðar á landinu þar sem tekist hefur vel til.

Safna- og menningarmálanefnd felur formanni nefndarinnar umboð að afla framangreindra gagna, kostnaðaráætlana, sambærilegra fordæma og mat á valkostum fyrir áframhaldandi umræðu nefndarinnar um málið. Í framhaldinu væri mikilvægt að ræða mögulega valkosti á opnum íbúafundi. Stefnt verði að fundi í nefndinni fyrir lok febrúar til þess að ræða næstu skref.

Bæjarráð þakkar safna- og menningarmálanefnd fyrir yfirgripsmikla umfjöllun um framtíð Samkomuhússins við Aðalgötu 6. Bæjarráð tekur undir að húsið sé mikilvægar menningarminjar og hluti af bæjarmynd og sögu Stykkishólms og að fyrirliggjandi gögn sýni að endurbætur á húsinæðinu séu nauðsynlegar á næstu árum.

Bæjarráð staðfstir að öðru leyti afgreiðslu nefndarinnar.

Bæjarstjórn Stykkishólms þakkar fyrir ítarlega umfjöllun um Samkomuhúsið við Aðalgötu 6 og leggur áherslu á að húsið sé mikilvægar menningarminjar, hluti af bæjarmynd og sögu Stykkishólms.

Bæjarstjórn telur jafnframt mikilvægt að ráðist verði í viðhald og endurbætur á húsnæðinu þannig að koma megi því í samfélagslega notkun sem fyrst.

Bæjarstjórn staðfestir að öðru leyti afgreiðslu bæjarráðs og safna- og menningarmálanefndar.
Samþykkt samhljóða.

Bæjarráð tekur jákvætt í fyrirliggjandi hugmyndir og felur bæjarstjóra að halda áfram viðræðum Aftanskin um fyrirliggjandi samningsdrög og að málið verði kynnt safna- og menningarmálanefnd.

Bæjarráð vísar samningnum til samþykktar í bæjarstjórn.

Samþykkt með 2 atkvæðum Steinunnar I. Magnúsdóttur og Hrafnhildar Hallvarðsdóttur gegn einu atkvæði Ragnars Más Ragnarssonar.

Safna- og menningarmálanefnd telur jákvætt að gerð sé tilraun til þess að nýta húsið að nýju. Nefndin leggur áherslu á að byggingarlist og menningarinnviðir verði ekki fyrir skemmdum. Safna- og menningarmálanefnd gerir að öðru leyti ekki efnislegar athugasemdir við fyrirliggjandi drög að samkomulagi.

Samþykkt með þremur atkvæðum fulltrúa H-lista gegn einu atkvæði fulltrúa Í-lista.


Bókun Önnu Melsteð, fulltrúa Í-lista:
Ég tel það mjög vanhugsað að opna á notkun samkomuhússinn með þeim hætti sem kynnt hefur verið á þessum fundi. Eftirlit og ráðgjöf fagaðila er hunsuð auk þess sem starfsemi í húsinu til framtíðar hefur ekki verið rædd í nefndinni heldur hefur umræðan snúist um gildi hússins í sögulegu samhengi og möguleika þess í framtíðinni eftir nauðsynlegar endurbætur og/eða endurbyggingu. Nefndin fjallaði um málefni Samkomuhússins á síðasta fundi þar sem nefndarfólk var sammála um að afla þyrfti gagna vegna endurbóta/endurbyggingar og meta þannig valkostina um framhaldslíf hússins. Auk þess bókaði nefndin að mikilvægt væri að ræða valkostina um starfsemi í húsinu á opnum íbúafundi og að næstu skref yrðu rædd á fundi nefndarinnar í febrúar 2026.

Anna Melsteð

Forseti bæjarstjórnar ber upp tillögu að afgreiðslu málsins ásamt tillögu að breytingum á samningi til að hnykkja á þeim áherslum sem legið hafa fyrir í málinu.

Bæjarstjórn samþykkir drög að samningi um afnot Samkomuhússins, með þeim viðbótum sem gerðar hafa verið, með því skilyrði að óháð og fagleg úttekt fari fram áður en starfsemi hefst og að staðfest verði að loftgæði séu ekki heilsuspillandi. Starfsemi skal ekki hefjast nema fyrir liggi staðfesting um að notkun húsnæðisins valdi ekki heilsutjóni. Þá skal gerð úttekt að nýju innan skamms tíma frá opnun og tryggt reglulegt eftirlit í framhaldinu. Fyrirliggjandi skýrslur um ástand húsnæðisins skulu fylgja samningnum.

Samþykkt með 4 atkvæðum bæjarfulltrúa H-lista gegn 3 atkvæðum bæjarfulltrúa Í-lista.

Til máls tóku RMR, HH, JBSJ, SIM, KH, ÞE


Bókun bæjarfulltrúa Í-listans:
Árið 2021 vann Verkfræðistofan Verksýn úttektarskýrslu á ástandi Aðalgötu 6 gamla samkomuhúsinu. Á sama tíma voru tekin sýni úr húsinu sem send voru til rannsóknar og kom í ljós að mikil mygla er í húsinu sem getur verið mjög skaðleg fyrir heilsu fólks, og jafnvel krabbameinsvaldandi.
Það er engan veginn boðlegt að meirihluti bæjarstjórnar ætli að líta framhjá alvarleika þeirra úttekta og rannsókna sem gerðar hafa verið á húsinu og ætla að afhenda það undir félagsstarf eldri borgara og golfhermi.
Undirrituð harma þessa niðurstöðu meirihlutans en með henni er meirihlutinn að taka áhættu með heilsu fólks.

Undirrituð
Ragnar Már Ragnarsson
Heiðrún Höskuldsdótti
Kristján Hildibrandsson


Bókun bæjarfulltrúa H- lista:
Fulltrúar H-lista telja mikilvægt að finna Samkomuhúsinu við Aðalgötu 6 hlutverk við hæfi og vinna markvisst að því að koma húsnæðinu aftur í samfélagslega notkun. Húsið er hluti af sögu samfélagsins og hefur um áratugaskeið verið vettvangur samkomu og menningarstarfs.

Fulltrúar H-lista telja rétt að bregðast við áhuga og frumkvæði sjálfboðaliða í sveitarfélaginu, sem kom að þeirra frumkvæði og láta reyna á verkefnið í áföngum, þar sem unnið er að úrbótum í smærri skrefum á meðan unnið er að undirbúningi og skipulagi á umfangsmeiri framkvæmdum á húsnæðinu.

Heilsa og öryggi íbúa skulu ávallt vera í forgangi. Því er það áréttað að gert er skilyrði af hálfu H-lista að óháð og fagleg úttekt fari fram áður en nokkur starfsemi hefst og að staðfest verði að loftgæði séu í lagi. Ekki er verið að líta fram hjá skýrslum um ástand hússins, heldur er einmitt brugðist við þeim með ábyrgum hætti með því að gera ráð fyrir úttekt áður en notkun hefst og reglulegri eftirfylgni í framhaldinu. Í þessu samhengi viljum við benda á framlagða breytingatillögu við 3. gr. samningsins við Aftanskin en þar stendur: Starfsemi á grundvelli samnings þessa skal ekki hefjast nema fyrir liggi óháð og fagleg úttekt sem staðfesti að loftgæði í húsnæðinu séu fullnægjandi og að notkun þess valdi ekki heilsutjóni. Við mat á því skal meðal annars byggt á fyrirliggjandi skýrslum og gögnum um ástand húsnæðisins, sem fylgja samningi þessum sem fylgiskjöl, og skal úttekt taka mið af þeim athugasemdum og ráðleggingum sem þar koma fram.
Jafnframt skal gerð úttekt að nýju innan hæfilegs tíma frá því að starfsemi hefst og tryggt reglulegt eftirlit í framhaldinu í samræmi við ráðleggingar sérfræðinga og ákvörðun sveitarfélagsins hverju sinni. Sveitarfélaginu er heimilt að fresta eða stöðva starfsemi tímabundið ef niðurstöður úttektar eða eftirlits gefa tilefni til, þar til fullnægjandi úrbætur hafa farið fram.

Það liggur fyrir að vilji er til staðar af hálfu H-lista til að nýta kraft samfélagsins til góðra verka og ef tekst að koma húsnæðinu í nothæft og öruggt ástand er það mjög jákvætt skref. Verkefnið er samfélagsverkefni og byggir á samstarfi og samvinnu innan sveitarfélagsins. Fulltrúar H-lista líta á þetta jafnframt sem mögulegt fyrsta skref í endurbyggingu húsnæðisins sem lengi hefur staðið til, þó slík ákvörðun hafi ekki verið tekin formlega.

Við áréttum að lokum að ætlun okkar er að ekki verði tekin nein áhætta þegar kemur að heilsu fólks og að tryggð verði góð upplýsingagjöf um stöðu húsnæðisins.

Hrafnhildur Hallvarðsdóttir
Steinunn Magnúsdóttir
Ragnar Ingi Sigurðsson
Þórhildur Eyþórsdóttir