Fréttasafn

Rekstur Sveitarfélagsins Stykkishólms skilar hagnaði samkvæmt ársreikningi 2024 sem tekin var til fyrri umræðu á bæjarstjórnarfundi þann 28. apríl sl. og jákvæðri rekstrarafkomu en áætlanir gerðu ráð fyrir. Endurspeglar ársreikningurinn að reksturinn sé að ná jafnvægi eftir krefjandi rekstrarumhverfi síðustu ár. Rekstrarniðurstaða fyrir afskriftir og fjármagnsliði var jákvæð um 286 millj. kr. og rekstrarniðurstaða án fjármunatekna og fjármagnsgjalda var jákvæð um 180 millj. kr. Rekstrarniðurstaða A og B hluta var jákvæð um 22 millj. kr. en fjárhagsáætlun með viðaukum hafði gert ráð fyrir jákvæðri rekstrarniðurstöðu að fjárhæð 11 millj. kr.

Leikhópurinn Lotta sýnir Hróa Hött í Hólmgarðinum í Stykkishólmi sunnudaginn 1. júní kl. 16:30. Sýningin er klukkutími að lengd og fer fram utandyra. Við hvetjum gesti til að klæða sig eftir veðri, koma með nesti, teppi og góðan ævintýraanda. Það er líka gott að hafa símann vel hlaðinn því eftir sýningu gefst áhorfendum kostur á að fá mynd af sér með sinni uppáhalds ævintýrapersónu.

Jakob Bro, Óskar Guðjónsson og Skúli Sverrisson halda tónleika í Vatnasafninu sunnudaginn 25. maí kl. 18:00, aðgangur ókeypis.

Strákarnir okkar í 11.flokki gerðu sér lítið fyrir og urðu Íslandsmeistarar í 2.deild í körfuknattleik í gærkvöldi. Snæfell spilaði gegn Stjörnunni/KFG í Umhyggjuhöllinni í gærkvöldi og endaði leikurinn 75-107. Þetta er afar glæsilegur árangur ekki síst fyrir þær sakir að Snæfell vann sig upp úr 3.deildinni í fyrra.

Grunnskólinn í Stykkishólmi er lifandi og skemmtilegur vinnustaður. Í skólanum starfa u.þ.b. 180 börn og 50 fullorðnir. Í skólanum er lögð áhersla á leiðsagnarnám, teymiskennslu og unnið er m.a. með byrjendalæsi og útikennslu á yngsta stigi og samþættingu námsgreina á mið- og unglingstigi. Einkunnarorð skólans eru gleði - samvinna - sjálfstæði

Hólmfríður Þórðardóttir, leikskólakennari, hefur verið ráðin í stöðu deildarstjóra á Nesi við Leikskólann í Stykkishólmi. 100% staða deildarstjóra var auglýst laus til umsóknar snemma í apríl og hefur nú verið gengið frá ráðningu en tvær umsóknir um stöðuna bárust. Hólmfríður hefur störf 1. september næstkomandi.

Þann 8. maí síðastliðinn, samþykkti bæjarstjórn Stykkishólms að auglýsa tillögu að breytingu á deiliskipulagi fyrir Víkurhverfi skv. 1. mgr. 41. gr. skipulagslaga nr. 123/2010. Skipulagsbreyting nær til lóðar D þar sem íbúðum fjölgar úr 4-6 í 10 íbúðir, byggingarreitur breytist þannig að 10 íbúðir passi betur á reitina og bílastæðum fjölgar úr 7 í 10.

Annar fundur bæjarstjórnar unga fólksins fór fram miðvikudaginn, 7. maí. Bæjarstjórn unga fólksins er skipuð ungmennum úr ungmennaráði sem sjá um fundarstjórn og undirbúning fundar. Á fundinum kynntu fulltrúar bæjarstjórnar unga fólksins áherslumál sín og bæjarfulltrúar brugðust við.

Eins og fram hefur komið er útisvæðið við Sundlaug Stykkishólms lokað vegna frramkvæmda. Framkvæmdir hófust 5. maí síðastliðinn og var upphaflega gert ráð fyrir að opna laugina þegar þessum áfanga yrði lokið og hafa sundlaug og vaðlaug opna á meðan unnið væri í að endurnýja heita potta. Verkið reyndist þó tímafrekara en áætlanir gerðu ráð fyrir og er nú útlit fyrir að allt útisvæðið verið lokað þangað til framkvæmdum er lokið að fullu. Beðist er velvirðingar á þeim óþægindum sem þetta kann að hafa í för með sér. Opnað verður eins fljótt og auðið er og allt kapp lagt á að klára framkvæmdina sem fyrst.

Ráðhúsið í Stykkishólmi verður lokað föstudaginn 16. maí vegna starfsmannaferðar.