Fréttasafn

Miklar framkvæmdir standa nú yfir við Aðalgötu og víðar í Stykkishólmi. Unnið er að því að malbika Aðalgötuna frá Pósthúsi fram yfir gatnamót Borgarbrautar. Þá stendur einnig til að malbika hluta Borgarbrautar auk minniháttar viðgerða hér og þar í bænum. Óhjákvæmilega fylgja framkvæmdum lokanir á götum en hjáleiðir eru merktar með skiltum. Á meðan framkvæmdum stendur við gatnamót Borgarbrautar og Aðalgötu er opið inn á bílaplan við Bónus frá Laufásvegi.

Nú þegar tekur að hausta fara sauðfjárbændur landsins að huga að fé sínu og smala niður af fjöllum. Fyrri leit er að þessu sinni laugardaginn 20.september og réttað í Arnarhólsrétt sunnudaginn 21.september, kl. 11:00. Kvenfélagið Björk verður með réttarkaffi í félagsheimilinu. Seinni leit verður laugardaginn 4. október og réttað sama dag.

Kvikmyndasafn Íslands kemur í heimsókn föstudaginn 19. september og verður með sýningu á myndefni frá Stykkishólmi í samstarfi við Amtsbókasafnið. Í myndefninu kennir ýmissa grasa, meðal annars sjást forsetaheimsóknir, ferming, sjómannadagur og fiskvinnsla í bænum um og eftir miðja síðustu öld. Sýnt verður í Setrinu á Höfðaborg kl. 15:00 og á Amtsbókasafninu kl. 17:00. Sýningin stendur í um 30 mínútur. Myndefnið er yfirleitt ekki með hljóði en mun Gunnar Kristófersson, frá Kvikmyndasafni Íslands, segja stuttlega frá efninu. Einnig verður gaman að sjá hvort viðstaddir þekki staðhætti og fólk á myndefninu.

Ráðhúsið í Stykkishólmi lokar kl. 12:00 föstudaginn 12. september vegna jarðarfarar.

Félagsstarf eldra fólks í Stykkishólmi er komið aftur af stað eftir sumarið. Ný dagskrá fyrir starfið er komin út en þar ættu allir að finna eitthvað við sitt hæfi. Dagskránna má sjá hér að neðan. Hægt er að smella á myndina til að sækka hana.

Umfangsmiklar framkvæmdir standa nú yfir við Aðalgötuna í Stykkishólmi en verið er að bæta undirlag götunnar áður en nýtt malbik verður lagt á hana. Á meðan framkvæmdum stendur er bílaumferð beint um Tjarnarás og Búðanesveg framhjá leikskólanum.

Sveitarfélagið Stykkishólmur óskar eftir að ráða vaktstjóra (karl) í Íþróttamiðstöð Stykkishólms. Um er að ræða framtíðarstarf og æskilegt að umsækjandi geti hafið störf 29. desember. Vaktstjóri er yfirmaður á vaktinni og hefur umsjón með daglegum störfum starfsfólks og stýrir verkskiptingu. Vaktstjóri er leiðbeinandi og veitir starfsfólki leiðsögn og/eða tilsögn um framkvæmd vinnunnar. Vaktstjóri stuðlar að góðum samskiptum og upplýsingaflæði á vinnustaðnum og á í samskiptum við Íþrótta- og tómstundafulltrúa.

Á vef Leikskólans í Stykkishólmi kemur fram að leikskólinn loki kl. 12:00 föstudaginn 12. september vegna jarðarfarar. Þann dag verður Inga (Árný Ingibjörg Ólafsdóttir) jarðsungin frá Stykkishólmskirkju kl. 13:00, en hún starfaði í leikskólanum í Stykkishólmi til fjölda ára.

Umhverfisganga verður í Stykkishólmi dagana 15. til 18. september. Ástæða þess að gangan er í seinna falli þetta árið er að ákveðið var að bíða eftir að nýjir starfsmenn væru komnir til starfa og búnir að kynnast starfseminni áður en farið væri í umhverfisgönguna. Í göngunni mun bæjarstjóri ásamt öðrum fulltrúum sveitarfélagsins, ganga með íbúum um hverfi Stykkishólms og huga að nánasta umhverfi. Tilgangur með umhverfisgöngunni er að efna til samtals um nánasta umhverfi, hvað megi betur fara í frágangi og umhirðu bæjarins, auk þess að miðla upplýsingum um fyrirhugaðar framkvæmdir.

Undanfarna daga hafa foreldrar og forráðamenn í Stykkishólmi orðið þess varir að óprúttnir aðilar hafi klippt á bremsuvíra á reiðhjólum barna. Eins og gefur að skilja er hér um að ræða stórhættulegt atferli sem þarf að stemma stigum við hið snarasta. Foreldrar og forráðamenn eru því hvattir til að ræða alvarleika málsins heima fyrir, skoða reiðhjól barna sinna og brýna fyrir börnunum að vera á varðbergi hvað þetta varðar.