Bæjarráð

Lögð fram fundargerð 7. fundar safna- og menningarmálanefndar.

Lögð fram fundargerð 10. fundar ungmennaráðs.

Lögð fram fundargerð 40. fundar skipulagsnefndar.

Lögð fram lóðarumsókn vegna fyrirhugaðra höfuðstöðva BB og sona ehf. á Hamraendum.



Afgreiðslu umsóknarinnar var frestað þar til endanlegt deiliskipulag lægi fyrir. Deiliskipulag svæðisins hefur nú verið samþykkt af hálfu bæjarstjórnar og fengið lögbundna umfjöllun af hálfu Skipulagsstofnunar.



Málið er því lagt fram til afgreiðslu í bæjarráði.

Lögð fram fundargerð 993. fundar stjórnar Sambandsins frá 18. febrúar 2026.

Lagðar fram niðurstöður viðhorfskönnunar sem lögð var fyrir starfsmenn sveitarfélagsins með það að markmiði að mæla viðhorf og starfsánægju starfsfólks sveitarfélagsins.



Fulltrúar Attentus koma til fundar við bæjarráð og gera grein fyrir niðurstöðum úr viðhorfskönnunar.

Slökkviliðsstjóri kemur til fundar og ræðir forsendur fyrir kaupum á körfubíl fyrir slökkviliðið.

Lagt fram erindi frá bæjarstjórn Snæfellsbæjar þar sem lagt er til að velferðarnefndir sveitarfélagana verði lagðar niður og stofnuð verði ein velferðarnefnd fyrir sveitarfélögin á Snæfellsnesi sem verði færð undir stjórn Félags- og skólaþjónustu Snæfellinga.



Bæjarráð óskaði,, á 41. fundi sínum, eftir að forstöðumaður Félags- og skólaþjónustu Snæfellinga komi til fundar til þess að gera grein fyrir málinu.

Lögð fram ósk Snæfells um aðstöðustyrk vegna fjölliðamóts á Íslandsmóti í körfubolta fyrir stelpur í 5.-6. bekk sem fram fer 27. - 29. mars nk.

Lögð fram umsagnarbeiðni um tækifærisleyfi fyrir skóladansleik og undankeppni söngkeppni Samfés fyrir Vesturland og Vestfirði í íþróttamiðstöð Stykkishólms.



Lögð fram umsögn sveitarfélagsins til staðfestingar.

Lagt fram erindi frá Núma Hjaltasyni, forsprakka Fjallkonunnar - kraftakeppni.

Lagt fram minnisblað skólastjóra og tillaga vegna stöðu deildarstjóra við Tónlistarskóla Stykkishólms.

Lögð fram lokagögn vegna hönnunar sögu- og gönguleiðar um Hjallatanga og Búðarnes. Verkefnið á sér nokkra forsögu, en það byggir á vinnu sveitarfélagsins frá árinu 2019 um eflingu átthagafræðslu, sýnileika sögunnar og þróun menningartengdrar ferðaþjónustu. Í framhaldi af þeirri stefnumótun var sótt um og fékkst styrkur til hönnunar verkefnisins á árunum 2021-2023.



Verkefnið hefur verið unnið í samstarfi við Minjastofnun Íslands og snýr að því að bæta aðgengi, stýringu og miðlun sögu svæðisins, sem er ríkt af menningarminjum og tengist upphafi verslunar í Stykkishólmi. Markmið verkefnisins er að gera svæðið aðgengilegra fyrir íbúa og gesti, styrkja útivist og náttúruupplifun og miðla sögu og menningararfi með vönduðum hætti.

Samkvæmt framlagðri hönnun er gert ráð fyrir gönguleiðum, áningastöðum, útsýnisstöðum og fræðsluskiltum þar sem leitast er við að lágmarka rask á landi og láta mannvirki falla sem best að náttúru og minjum svæðisins. Verkefnið er hugsað í áföngum, þar sem hönnun er fyrsta skref en framkvæmd stígagerðar og uppsetning miðlunarefnis næstu skref.



Jafnframt liggur fyrir kostnaðarnálgun vegna framkvæmda, þar sem heildarkostnaður við uppbyggingu áningastaða, stíga, mannvirkja og skiltagerðar er áætlaður um 45-50 m.kr., eftir útfærslu og áföngum.

Lögð fram umsókn um stöðuleyfi fyrir matvagn á hafnarsvæði.

Lögð fram umsókn um stöðuleyfi fyrir matvagn á hafnarsvæði.

Lögð fram umsókn Farfuglaheimilisins Sjónarhóls ehf. um rekstrarleyfi til reksturs gististaðar í flokki II, minna gistiheimili, sem rekið verður sem Höfdabær að Höfðagötu 3 í Stykkishólmi. Einnig er lögð fram umsögn skipulagsfulltrúa vegna málsins.

Lögð fram tvö erindi skólastjóra þar sem óskað er eftir breytingum á fjárhagsáætlun vegna annarsvega tækjakaupa og hinsvegar aðbúnaði skóla.

Lagt fram formlegt kauptilboð í íbúð 211 að Skúlagötu 9.

Innviðaráðherra hefur lagt fram fyrir Alþingi frumvarp til laga um breytingu á lögum um stjórn fiskveiða, nr. 116/2006 (sértækar ívilnanir og jöfnunarheimild) þar sem lagt er til að fella brott línuívilnanir og skel- og rækjubætur.



Frumvarp innviðaráðherra er lagt fram.



Þá er lögð fram ályktun stjórnar Samtaka sveitarfélaga á Vestulandi vegna málsins og afturköllun lóðarumsóknar á Hamraendum vegna áforma innviðaráðherra um skelbætur.

Lagt fram erindi frá UNICEF á Íslandi sem hefur nú opnað fyrir umsóknir um þátttöku í verkefninu Barnvæn sveitarfélög.



Bæjarráð vísaði erindinu, á 37. fundi sínum, til umsagnar í æskulýðs- og íþróttanefnd og ungmennaráði.



Ungmennráð taldi, á 9. fundi sínum, Sveitarfélagið Stykkishólm vera að uppfylla flestar tillögur og hollráð sem UNICEF leggur fyrir. Ráðið vildi þó ekki taka formlega ákvörðun nema fá nánari upplýsingar um hvað felst í því að taka þátt í verkefni UNICEF um barnvæn sveitarfélög.



Á 10. fundi sínum óskaði ungmennaráð eftir kynningu á vekefninu og hvað felist í umsókn um þátttöku sveitarfélagsins frá fulltrúa UNICEF fyrir ungmennaráð og bæjarstjórn.

Bæjarráð taldi, á 17. fundi sínum, að mismunandi túlkun nefnda sveitarfélagsins á gr. 4.1 í aðalskipulagi Helgafellssveitar 2014-2024 gefi tilefni til að skerpa á texta greinarinnar, m.a þegar horft er til hvenær skuli deiliskipuleggja, á þeim svæðum þar sem er fyrirhuguð uppbygging. Á þetta við lögbýli og allt það land sem hefur verið stofnað úr þeim, gildir þá einu hvaða landnotkunarflokki það tilheyrir samkvæmt skilgreiningu 6. kafla skipulagsreglugerðar 90/2013. Bæjarráð samþykkti að fela skipulagsfulltrúa að vinna minniháttar breytingu á greininni en lagði áherslu á að þær byggingarheimildir sem eru nú þegar í gildandi aðalskipulagi Helgafellssveitar verði óbreyttar þar til að nýtt aðalskipulag fyrir sameinað sveitarfélag Helgafellssveitar og Stykkishólmsbæjar, sem samþykkt hefur verið að hefja vinnu við, tekur gildi.



Á 41. fundi bæjarráðs var skipulagsfulltrúa falið að vinna við umrædda breytingu á aðalskipulagi með það að markmiði að skýra umrætt ákvæði í aðalskipulagi Helgafellssveitar 2012-2022.



Málið var kynnt á 40. fundi skipulagsnefndar og tekið til umfjöllunar. Umræður voru um grein 4.1 í greinargerð aðalskipulags Helgafellssveitar. Skipulagsfulltrúa var falið að vinna áfram að breytingum á aðalskipulagi.

Lögð fram tillaga að breytingu á deiliskipulagi Klapparáss, verslun- og þjónusta, lóð 3 Hleðsluinnviðir.

Óskað er eftir að fá að auglýsa tillöguna að breytingu skv. 1. mgr. 43. gr. skipulagslaga.



Á 40. fundi skipulagsnefndar var lögð fram að nýju tillaga að breytingu á deiliskipulaginu. Þá voru lögð fram gögn sem borist hafa frá Atlantsolíu þar sem óskað er eftir að stækka lóð Atlantsolíu á kostnað lóðar 3 og koma þar fyrir hraðhleðslustöðvum og bílaþvottastöð.



Skipulagsnefnd lagði til að ræða við ON varðandi aðstöðu á lóð 3 eftir breytingu. Skipulagsnefnd fól skipulagsfulltrúa að ræða við Instavolt um staðsetningu og útlit stöðva í miðbænum.

Með vísan til framanritaðs og fyrirliggjandi gagna fól skipulagsnefnd skipulagsfulltrúa að uppfæra deiliskipulagsbreytinguna m.t.t. nýrra gagna og umræðna á fundinum.

Fyrir rúmu ári síðan fékk Anna Melsteð styrk frá Lista- og menningarsjóði Sveitarfélagsins Stykkishólms vegna sögumiðlunar um miðbæ Stykkishólms. Lögð er fram tillaga Önnu að söguskilti um gamla miðbæinn sem óskar eftir að fá að setja það upp á Bókhlöðuhöfða.



Skipulagsnefnd samþykkti, á 40. fundi sínum, fyrir sitt leyti að setja upp söguskilti við Bókhlöðuhöfða, en gerir ráð fyrir að efnisatriði skiltisins fái umfjöllun í safna- og menningarmálanefnd eða bæjarstjórn. Nákvæm staðsetning skiltis skal vera í samráði við skipulagsfulltrúa.

Led Birtingar óskar eftir að fá leyfi til að setja upp tímabundinn færanlega LED auglýsingaskjá í Stykkishólmi. Um er að ræða skjá sem er u.þ.b. 10 fermetrar að stærð. Tímabilið sem óskað er eftir er 1. apríl - 1. september 2026.



Skipulagsnefnd þakkar erindið en sér ekki fyrir sér að settur verði upp 10 fermetra ledskjár innan þéttbýlis.

Lögð fram drög að samningum við Orkusöluna og Teslu ásamt skýringarmyndum vegna hraðhleðslustöðva.

Lagt fram erindi frá Markaðsstofu Vesturlands sem vegna almyrkva á Vesturlandi, kanna möguleika á því hvort landeigendur geti sett upp tímabundin tjaldsvæði í ágúst í almyrkvann.

Lagðar fram niðurstöður loftgæðamælinga í Samkomuhúsinu í Stykkishólmi.

Á 9. fundi ungmennaráðs fór fram umræða um bæjarstjórn unga fólksins. Ungmennaráð lagði til við bæjarstjórn að næsti bæjarstjórnarfundur unga fólksins færi fram 7. maí 2026.



Bæjarráð samþykkti, á 40. fundi sínum, að bæjarstjórnarfundur unga fólksins verði haldinn en óskar eftir annarri tillögu að fundartíma sem fellur betur að fyrirliggjandi fundaráætlun bæjarráðs og bæjarstjórnar.



Ungmennaráð lagði á 10. fundi sínum til að bæjarstjórnarfundur unga fólksins verði haldið 9. apríl, 2026.

Lögð fram húsnæðisáætlun sveitarfélagsins 2026.

Lögð fram gögn varðandi framtíðarform og þróun Vatnasafns. Jafnframt er lagt fram minnisblað bæjarstjóra, unnið að beiðni formanns nefndarinnar, um fund bæjarstjóra og forsætisráðherra vegna málsins, ásamt öðrum minnisblöðum og gögnum sem tengjast málinu.



Safna- og menningarmálanefnd lýsti, á 4. fundi sínum, skýrum vilja til að ná samningi um framtíð Vatnasafns í Stykkishólmi. Í því samhengi lagði nefndin ríka áherslu á mikilvægi þess að sveitarfélagið fái viðeigandi stuðning til uppbyggingar menningarinnviða í samræmi við fyrirliggjandi gögn, enda sé slíkur stuðningur lykilatriði í ljósi umfangsmikilla og langtímasamninga sem nú liggja fyrir um rekstur safnsins. Nefndin tók jafnframt undir efni minnisblaðs bæjarstjóra, minnisblað verkefnastjóra menningarmála á Vesturlandi og fundargerð vinnuhóps um framtíðarfyrirkomulag safnsins.



Bæjarráð samþykkti á 24. fundi sínum afgreiðslu nefndarinnar og vísaði málinu áfram til frekari vinnu í vinnuhópi um framtíð Vatnasafns.



Safna- og menningarmálanefnd þakkaði, á 6. fundi sínum, fyrir framlagðar upplýsingar, þar á meðal minnisblað bæjarstjóra, drög að nýjum samningi um Vatnasafnið og minnisblað verkefnastjóra menningarmála á Vesturlandi. Nefndin taldi að framangreind gögn varpi skýru ljósi á bæði menningarlegt gildi Vatnasafnsins og þau umfangsmiklu fjárhagslegu og rekstrarlegu verkefni sem tengjast framtíð safnsins. Nefndin ítrekaði fyrri afstöðu sína, líkt og fram kom á 4. fundi nefndarinnar, um að mikilvægt sé að ná samningi um framtíð Vatnasafnsins í Stykkishólmi. Í því samhengi lagði nefndin þunga áherslu á að sveitarfélagið fái viðeigandi stuðning til uppbyggingar menningarinnviða og til að mæta þeim langtímasamningsskuldbindingum sem fram koma í nýjum samningsdrögum. Nefndin tók undir þau sjónarmið sem fram koma í minnisblaði bæjarstjóra um að utanaðkomandi fjármögnun sé nauðsynleg forsenda þess að unnt sé að gera bindandi samning til lengri tíma. Nefndin tók jafnframt undir að tækifæri til að efla menningartengda ferðaþjónustu og samfélagslega virkni safnsins séu veruleg og vægi þess innan samtímalistar er ómetanlegt, en að viðhaldsþörf húseignarinnar og listaverksins kalli á aðkomu ríkisins, líkt og rakið er í framlögðum gögnum.



Safna- og menningarmálanefnd hvatti til þess að vinnuhópur um framtíð Vatnasafns fundi með annars vegar fulltrúum ríkisins og hins vegar fulltrúum listamannsins til að fara yfir stöðu málsins. Með vísan til framangreinds samþykkti nefndin að vísa málinu áfram til frekari vinnu í vinnuhópi um framtíð Vatnasafns og óskaði eftir að næstu skref í samningsgerð verði lögð fyrir nefndina þegar þau liggja fyrir.



Bæjarráð þakkaði, á 39. fundi sínum, fyrir framlagðar upplýsingar og ítarlega umfjöllun safna- og menningarmálanefndar um framtíðaráform Vatnasafnsins. Bæjarráð tók undir afstöðu nefndarinnar um að utanaðkomandi fjármögnun sé lykilforsenda þess að unnt sé að gera langtímasamning um rekstur safnsins. Bæjarráð staðfesti að öðru leyti afgreiðslu nefndarinnar. Bæjarráð samþykki að vísa málinu áfram til áframhaldandi vinnu starfshóps um framtíð Vatnasafnsins og fól bæjarstjóra jafnframt að fylgja málinu eftir gagnvart ríkinu. Bæjarráð óskaði einnig eftir að starfshópurinn leggi fram tillögur um næstu skref í samningsgerð og aðkomu ríkisins þegar þær liggja fyrir.



Bæjarstjórn staðfesti afgreiðslu bæjarráðs og safna- og menningarmálanefndar á 43. fundi sínum.



Á 40. fundi bæjarráðs var málið tekið up upp að nýju í kjölfar samskipta milli sveitarfélagsins og fulltrúa listamannsins varðandi næstu skref málsins með áherslu farsæla lausn á húsnæðisþætti málsins. Fulltrúi Roni Horn mætti til fundar við bæjarráð.



Bæjarráð fól bæjarstjóra að vinna áfram að málinu með áherslu farsæla lausn á húsnæðisþætti málsins.



Bæjarstjóri gerði grein fyrir málinu á 7. fundi safna- og menningarmálanefndar. Nefndin taldi mikilvægt að skoða alla möguleika í stöðunni en vísaði frekari umræðu til næsta fundar sem stefnt er að halda fljótlega.

Fjölmargir ferðamenn gera sér ferð í Stykkishólm til þess að sjá tökustað kvikmyndarinnar The Secret Life of Walter Mitty í bænum og er þar þyrluatriði myndarinnar sérstaklega vinsælt. Ljóst að fjölmargir gestir sýna því áhuga að sjá umhverfið úr myndinni með eigin augum. Fyrir liggur því sú hugmynd að setja upp upplýsingaskilti um kvikmyndina um The Secret Life of Walter Mitty sem tekin var upp m.a. á hafnarsvæðinu í Stykkishólmi og staðsetja það á horninu hjá grassvæði sem staðsett er hinum meginn við gamla apótekið. Óskar bæjarstjóri eftir afstöðu safna- og menningarmálanefndar til þessarar hugmyndar.



Safna- og menningarmálanefnd tók á 108. fundi sínum vel í þessa hugmynd og staðsetningu á svæðinu til móts við Gamla-Apótekið (t.d. suðvestan megin) og mælir með því að málið verði unnið áfram og jafnframt í því sambandi að huga að öðrum kvikmyndum, auglýsingum eða sjónvarpsþáttum.



Safna og menningarmálanefnd lagði til, á 7. fundi sínum, að skoða aðrar lausnir til að miðla kvikmynda- og sjónvarpssögunni í Stykkishólmi en skiltagerð, t.d. með því að koma fyrir QR kóða sem vísar á vefsíðu hjá sveitarfélaginu um þessa sögu. Nefndin lagði áherslu á að skilti eða hverskonar miðlun sem sett verður fram verði fyrirferðarlítil þar sem fyrir er mikill fjöldi skilta í miðbænum/hafnarsvæði.

Bæjarstjóri gerir grein fyrir stöðu verkefnisins Þekkingarnet Breiðafjarðar í kjölfar fundar með verkefnastjóra og framkvæmastjóra SSV.