Fréttir

Aðventan er viðburðaríkur tími í Stykkishólmi og færist sífellt í aukanna að landsmenn sæki Hólminn heim til að upplifa töfrandi jólastemmninguna með heimamönnun. Víða eru Hólmarar farnir að hengja upp skreytingar fyrir jólatíðina og fyrirtæki byrjuð að auglýsa jólahlaðborð og fleira. Líkt og undanfarin ár er nú unnið að því að setja saman viðburðardagskrá fyrir aðventuna í Hólminum sem gerð verður aðgengileg fyrir íbúa og gesti.

Aðalfundur Björgunarsveitarinnar Berserkja verður haldinn þriðjudaginn 11. nóvember 2025 kl. 20:00 í húsi Félagsins á Nesvegi 1. Meðal dagskrárliða á fundinum er skrásetning sögu félagsins en björgunarveitin vinnur nú að því að skrásetja sögu Berserkja með skipulögðum hætti. Fyrsta fundargerðabók björgunarsveitarinnar hefur ekki komið í leitirnar ennþá og biðlar sveitin því til þeirra sem eitthvað kunna að vita um afdirf hennar að hafa samband.  Þá eru allar upplýsingar frá tímabilinu 1972 til 1976 vel þegnar. Þeir sem geta sagt frá störfum sveitarinnar frá þessum tíma, vinsamlegast hafið samband við Svanborgu í síma 860 8843 eða á netfangið svansig50@gmail.com

Þá vekur skammdegið jafnan athygli á þeim ljósastaurum sem sinna ekki tilgangi sínum sem skildi en sveitarfélagið hefur fengið nokkrar ábendingar um ljóslausa staura hér og þar í bænum. Sveitarfélagið tók við umsjón ljósastaura af Rarik árið 2019 og var fljótlega byrjað að skipta út gömlum lömpum og LED lampar settir í staðinn. Þetta bætir lýsingu og sparar rekstrakostnað á götulýsingu í Stykkishólmi umtalsvert. Búið er að LED-væða víða í bænum en það verkefni er enn í gangi. Eins og sjá má á myndinni hér til hliðar er nú unnið að því að lagfæra þá staura sem er ljóslausir.

Í ljósi þess að veðurspá fyrir föstudag er afar slæm hefur foreldrafélag grunnskólans ákveðið að flýta göngunni í ár og hvetur fjölskyldur og vini til að ganga í hús á eigin forsendum milli kl. 17:30 og 19:30 fimmtudaginn 30. október, þar sem börn safna sér sælgæti. Eins og áður verður gengið út frá þeirri reglu að banka megi uppá þar sem hús hafa verið merkt eða skreytt við eða á hurðina með skýrum hætti í tilefni Hrekkjavökunnar.

41. fundur bæjarstjórnar Stykkishólms fer fram fimmtudaginn 30. október 2025 kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Menningarhátíðin Norðurljósin er haldin í áttunda sinn í Stykkishólmi nú um helgina. Opnun hátíðarinnar fór fram í Stykkishólmskirkju í gær, fimmtudag, og var það Hrafnhildur Hallvarðsdóttir, forseti bæjarstjórnar setti hátíðina og flutti ávarp.

Menningarhátíðin Norðurljósin verður haldin í áttunda sinn í Stykkishólmi dagana 22.-26. október. Opnunarhátíð fer fram í kvöld, fimmtudagskvöld, en þar mun Stjörnu Sævar fræða viðstadda um almyrkann 2026 sem margir bíða af mikilli eftirvæntingu. Boðið verður upp á glæsileg tónlistaratriði og venju samkvæmt fer fram heiðrun fyrir framlag til lista- og menningarmála í Stykkishólmi.

Boðað er til kvennaverkfalls föstudaginn 24. október nk. Sem fyrr tekur Sveitarfélagið Stykkishólmur undir þau meginmarkmið kvennaverkfalls að hefðbundin kvennastörf, jafnt launuð sem ólaunuð, skuli meta að verðleikum. Það er jafnframt ekkert launungarmál að starfsemi sveitarfélagsins skerðist verulega án vinnuframlags kvenna. Sveitarfélagið mun ekki draga af launum starfsfólks sem tekur þátt í kvennaverkfallinu í samráði við sinn stjórnanda.

Opið hús verður þriðjudaginn 21. október í Ráðhúsinu í Stykkishólmi frá kl. 17:00 – 18:00. Þar verður hægt að kynna sér skipulagstillögur fyrir Hamraenda og Kallhamar og skipulagstillögur vegna Agustsonreitar.

Félagsmiðstöðin X-ið tekur þátt í félagsmiðstöðva- og ungmennahúsavikunni með því að bjóða foreldrum, systkinum og íbúum að kíkja við í opnanir. Vikan hefur það að markmiði að varpa ljósi á mikilvægi og virði þessa vettvangs fyrir börn og ungmenni. Foreldrar, forráðamenn, systkini, vinir og aðrir aðstandendur eru hvött til að kynna sér starfsemina.