Fréttir

Bæjarstjórn Sveitarfélagsins Stykkishólms hefur samþykkt fjárhagsáætlun fyrir árið 2026 og þriggja ára áætlun 2027–2029. Áætlunin er unnin út frá forsendum og markmiðum sem bæjarstjórn setti í upphafi vinnu við gerð fjárhagsáætlunar og er afrakstur góðrar samvinnu kjörinna fulltrúa og starfsfólks sveitarfélagsins og endurspeglar ábyrga fjármálastjórn, jákvæðan rekstur og nauðsynlegar en hóflegar innviðafjárfestingar. Í fyrirliggjandi fjárhagsáætlun er lögð rík áhersla á aðhald og ábyrgð í rekstri sveitarfélagsins á sama tíma og þjónusta við íbúa er tryggð og efld. Fjárhagsáætlunin byggir á jafnvægi í rekstri, sterku veltufé frá rekstri og markvissri lækkun skulda og skuldaviðmiðs á næstu árum.

Strætó hefur tilkynnt um breytingar á leiðakerfi sínu sem taka gildi 1. janúar 2026. Með breyttu leiðakerfi er stigið skref í átt að betri og aðgengilegri almenningssamgöngum á landsbyggðinni, segir á vef Strætó. Með breytingunum verður stoppistöð sem áður var við Bensó/Skúrinn færð að íþróttamiðstöðinni.

Friðarganga verður gengin á Þorláksmessu og hefst hún samkvæmt venju kl. 18.00. Gengið verður frá Hólmgarði niður á Pláss og mun Sr. Hilda María Sigurðardóttir  í fylgd með bæjarstjóra leiða gönguna. Níundi bekkur grunnskólans verður með sölu á rafkertum við upphaf göngu á kr. 1.600, og heitt súkkulaði að lokinni friðagöngu. Að venju mun 9. bekkur einnig veita viðurkenningu fyrir fallegustu jólaskreytinguna í bænum sem nemendur sjá um að velja.

Opnað hefur verið fyrir umsóknir í lista- og menningarsjóð Stykkishólms. Samkvæmt reglum um styrkveitingar er hlutverk sjóðsins meðal annars að: Styðja og styrkja lista og menningarstarf í Stykkishólmi og hvetja til nýsköpunar á sviði lista og menningar er tengjast Stykkishólmi. Styðja við útgáfustarfsemi er varðar sögu, menningu og atvinnuhætti bæjarins. Styðja við varðveislu menningarminja.

Sveitarfélagið Stykkishólmur óskar eftir að ráða metnaðarfullan og jákvæðan einstakling í starf launafulltrúa. Um er að ræða fjölbreytt og krefjandi starf í góðu starfsumhverfi. Næsti yfirmaður launafulltrúa er skrifstofu- og fjármálastjóri. Starfshlutfall er 100% og æskilegt er að viðkomandi geti hafið störf 1. mars 2026 eða eftir samkomulagi

Hátíðartónleikar Tónlistarskóla Stykkishólms fara fram í Stykkishólmskirkju þriðjudaginn 16. desemberkl. 18:00.  Fjöldi nemenda koma fram á tónleikunum og er efnisskráin fjölbreytt og skemmtileg. Verið öll hjartanlega velkomin.

Jólasveinaratleikurinn góði hefst í dag. Starfsmenn í áhaldahúsi hafa sett upp jólasveinaratleik til að stytta börnum og fjölskyldufólki stundir á aðventunni. Um er að ræða skemmtilega viðbót í jólaskreytingar bæjarins þar sem tækifæri gefst til að arka um Stykkishólm og leita að jólasveinunum sem eru í ýmsum erindagjörðum fyrir jólin og munu birtast hér og þar um bæinn, einn af öðrum. Í fyrra bættust þau Grýla og Leppalúði við og hefst leikurinn því í dag, fimmtudaginn 11. desember með komu Grýlu og Leppalúða. Ratleikurinn endar svo með komu Kertasníkis á Aðfangadag 24. desember.

43. fundur bæjarstjórnar Stykkishólms fer fram fimmtudaginn 11. desember 2025 kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Boðað er til íbúafundar mánudaginn 8. desember um fjárhagsáætlun sveitarfélagsins fyrir tímabilið 2026-2029 og vinnu við nýtt aðalskipulag sveitarfélagsins. Fundurinn fer fram á Höfðaborg, Skólastíg 14, og hefst kl. 17:00 þann 8. desember. Á fundinum gerir bæjarstjóri grein fyrir markmiðum fjárhagsáætlunar og helstu áherslum hennar. Þá kynna fulltrúar Alta einnig vinnu við nýtt aðalskiplag, það fyrsta fyrir sameinað sveitarfélag. Í aðalskipulaginu er mörkuð stefna fyrir framþróun sveitarfélagsins. Íbúar eru hvattir til að mæta á fundinn og kynna sér fjárhagsáætlun sveitarfélagsins og skipulagsmál.

Alþingi hefur nú til meðferðar tillögu til þingsályktunar um samgönguáætlun fyrir árin 2026–2040 ásamt fimm ára aðgerðaáætlun 2026–2030, en innviðaráðherra kynnti í dag áform ríkisstjórnarinnar á kynningarfundi sem bar yfirskriftina „Ræsum vélarnar“. Þar var lögð áhersla á að efla viðhald vega, hefja stórframkvæmdir og hraða uppbyggingu innviða um land allt. Í fyrirliggjandi samgönguáætlun er Snæfellsnesvegur 54 um Skógarströnd loks settur í forgang hvað nýframkvæmdir varðar og gert ráð fyrir umfangsmiklum framkvæmdum á veginum á næstu árum. Þá er verið að leggja grunn að lagfæringum og uppbyggingu á Stykkishólmsvegi inn í Stykkishólm, en það er tekið úr öðrum potti (ekki nýframkvæmdum).