Fréttasafn

Hækusýning hefur verið sett upp á Frúarhól í þriðja sinn. Anna Sigríður Gunnarsdóttir stendur fyrir sýningunni ásamt höfundi, en hækurnar eru eftir Theodóru Gallant Helgason, og eru á ensku.

Þann 12. ágúst 2026 verður almyrkvi á sólu sjáanlegur frá Íslandi í fyrsta sinn síðan 1954. Almyrkvi á sér stað þegar tunglið gengur beint milli sólar og jarðar og skyggir alveg á sólina í örfáar mínútur. Á þeim tíma verður dimmt og hita­stig getur jafnvel lækkað lítil­lega. Fyrir og eftir almyrkva sést deild­ar­myrkvi, það er þegar tunglið skyggir á hluta sólar.Almyrkvinn sést frá Vestfjörðum, Snæfellsnesi og Vesturlandi, höfuðborgarsvæðinu og Reykjanesskaga.

Hljómsveitin SÓT steig á svið á Wacken Metal Battle í Þýskalandi í gær og stóð sig með miklum glæsibrag fyrir hönd Íslands. Hljómsveitina skipa Hólmararnir Ísleifur Jónsson gítarleikari og Ívar Leo Hauksson bassaleikari ásamt norðlendingunum Arnari Smára Sigurðssyni trommuleikara, Aroni Frey Ívarssyni söngvara og Daníel Hrafni Ingvarssyni gítarleikara. SÓT vann sér þátttökurétt í alþjóðlegu lokakeppninni með sigri í íslensku undankeppninni fyrr á árinu og keppir nú við hljómsveitir víðs vegar að úr heiminum á Wacken Open Air, einni stærstu þungarokkshátíð heims.

Í Íslendingasögunum eru lýsingar á bardögum þar sem einstaklingar berjast á bátum á sjó en detta útbyrðis og þurfa að synda til að bjarga lífi sínu, eins og í Ólafs sögu Tryggvasonar, ellegar sökkva. Til að kynnast betur sögunum okkar efna skipuleggjendur viðburðarins til keppni milli sundlauga í hringabrynjusundi til að komast að því hversu erfitt er að synda "milli skipa" í hringabrynju eins og Ólafur Tryggvason - frá einum bakka grunnu laugarinnar yfir á hinn.

Breiðafjarðarferjan Baldur sneri heim í dag, fimmtudaginn 23. júlí, eftir að hafa sinnt siglingum milli Landeyjahafnar og Vestmannaeyja frá því í byrjun júní vegna bilunar í Herjólfi. Frá og með morgundeginum, 24. júlí, hefjast svo reglubundnar ferjusiglingar milli Stykkishólms, Flateyjar og Brjánslækjar á ný. Vegagerðin tilkynnti um ákvörðun innviðaráðherra um að færa Baldur til Vestmannaeyja 2. júní eftir að önnur vél Herjólfs bilaði. Baldur hóf siglingar þar 8. júní til að tryggja samgöngur við Eyjar á meðan viðgerð stóð yfir. Á sama tíma tók farþegabáturinn Særún við siglingum til Flateyjar en engar siglingar voru yfir á Brjánslæk.

Víkingurinn 2026, aflraunakeppni milli sterkustu manna landsins, fer fram dagana 24. - 26. júlí 2026 og fara tvær keppnisgreinar og verðlaunaafhending fram í Stykkishólmi. Sunnudaginn 26. júlí taka kraftajötnar á honum stóra sínum fyrir utan Sjávarpakkhúsið og eru íbúar hvattir til að fjölmenna og styðja keppendur áfram. Að keppni lokinni verður verðlaunaafhending.

Fyrr á þessu ári var ráðist í hreinsunarátak á Reitarvegi. Sveitarfélagið heldur nú áfram hreinsunarátakinu og hvetur nú eigendur lausamuna á Skipavíkursvæði til að nýta gám sem þar hefur verið staðsettur og fegra og hreinsa svæðið. Gámurinn er eingöngu ætlaður fyrir málma og járn og er liður í áframhaldandi átaki sveitarfélagsins til að bæta umgengni og stuðla að snyrtilegum atvinnusvæðum. Sveitarfélagið hvetur alla sem eiga lausamuni úr járni á Skipavíkursvæðinu til að nýta sér gáminn og leggja sitt af mörkum til að gera svæðið snyrtilegra og öruggara.

Sveitarfélagið Stykkishólmur óskar eftir að ráða karl í starf í í Íþróttamiðstöð Stykkishólms. Um er að ræða framtíðarstarf í 100% vaktavinnu, unnið er á morgun- , kvöld- og helgarvöktum í samræmi við opnunartíma. Æskilegt að umsækjandi geti hafið störf í byrjun september 2026. Umsóknarfrestur er til 31. júlí 2026. Öllum umsóknum verður svarað.

Framkvæmdum við endurbætur á vatnsrennibraut Sundlaugar Stykkishólms lauk í dag en þær hófust 22. júní. Markmið framkvæmdanna var að auka bæði öryggi og upplifun gesta af brautinni.

Leikskólinn í Stykkishólmi býður upp á fjölbreytt og gefandi starf í góðu starfsumhverfi þar sem fagmennska, samstarf og vellíðan eru í fyrirrúmi. Leikskólinn óskar eftir að ráða leikskólakennara í 100% starf.