Fréttasafn

Loftgæðamælingar voru framkvæmdar í Samkomuhúsinu 12. mars síðastliðinn og sýna að loftgæði þar eru góð og innan eðlilegra marka. Mælingarnar voru framkvæmdar af fyrirtækinu Disact með svokallaðri Mycometer-aðferð, sem metur magn sveppaagna og annarra ofnæmisvalda í innilofti. Niðurstöður mælinga eru túlkaðar samkvæmt viðmiðunarkerfi sem flokkar þær í flokka A+ til D eftir magni sveppaagna og ofnæmisvalda í lofti. Reyndust niðurstöður úr Samkomuhúsi falla í flokka A og A+, sem samkvæmt viðmiðum þýðir að magn sveppaagna og ofnæmisvalda sé eðlilegt eða mjög lágt.

Á Snæfellsnesi hefur verið samþykkt ný og uppfærð sjálfbærnistefna sem markar næsta skref í sameiginlegri vegferð sveitarfélaganna í loftslags- og umhverfismálum. Stefnan byggir á þeirri vinnu sem þegar hefur átt sér stað á svæðinu, en felur í sér skýrari og markvissari markmiðasetningu – sérstaklega þegar kemur að beinni losun gróðurhúsalofttegunda vegna starfsemi sveitarfélaganna sjálfra.

Júlíana – hátíð sögu og bóka er haldin í þrettánda sinn dagana 19.–21. mars 2026. Hátíðin var fyrst sett á laggirnar árið 2013 og hefur síðan fest sig í sessi sem mikilvægur þáttur í lista- og menningarlífi Hólmara. Að venju verður boðið upp á fjölbreytta og metnaðarfulla dagskrá þar sem rithöfundar, ljóðskáld og aðrir listamenn stíga á svið. Í ár er sérstök ástæða til að fagna, þar sem verk Júlíönu Jónsdóttur, sem hátíðin dregur nafn sitt af, eiga merkisafmæli. Bókin Stúlka kom út árið 1876, fyrir 150 árum, og árið 1916, eftir að Júlíana fluttist til Vesturheims, kom út bókin Hagalagðar í Winnipeg í Kanada, fyrir 110 árum.

Myndlistarsýningin Eyjalíf eftir Reyni Vilhjálmsson opnar í Norska húsinu - Byggðasafni Snæfellinga og Hnappdæla föstudaginn 20. mars kl. 14:30. Sýningin er haldin í tengslum við Júlíönuhátíð í Stykkishólmi.

Bæjarstjórn Stykkishólms skipaði, á 24. fundi sínum, starfshóp um mótun stefnu sveitarfélagsins í íþróttamálum. Hlutverk hópsins m.a. að móta framtíðarsýn um fjölbreytt íþrótta- og tómstundastarf fyrir íbúa á öllum aldri, bæði innan- og utandyra. Þá var starfshópnum falið að leggja fram tillögur að uppbyggingu íþróttatengdra mannvirkja í sveitarfélaginu, þar sem horft verður til staðsetningar, hlutverks mannvirkja, forgangsröðunar verkefna, tímasetninga og kostnaðarmats. Stuttur umræðu- og kynningarfundur um fyrirliggjandi hugmyndir í tengslum við vinnu starfshópsins verður haldinn fyrir íbúa sveitarfélagsins mánudaginn 16. mars nk. kl. 17:00-17:30. Fundurinn fer fram á Höfðaborg.

Kjörstjórn sveitarfélagsins Stykkishólms hefur opnað fyrir rafræna meðmælendasöfnun fyrir framboð til sveitarstjórnar á vef Ísland.is Mælst er til þess að oddvitar framboða stofni söfnun en nafn þeirra og fæðingardagur birtist sem stofnandi söfnunar. Einnig er heimilt að safna meðmælum á pappír en mælst er til þess að þau séu slegin inn í rafræna meðmælendakerfið áður en frumritum meðmælanna er skilað inn ásamt framboðs tilkynningu.

Lóðin Áskinn 6 er hér með auglýst til úthlutunar í samræmi við reglur um úthlutun lóða í Stykkishólmi og bætist þar með á úthlutunarlista yfir lausar lóðir í Stykkishólmi. Umsóknarfrestur er til og með 25. mars 2026.

Í tilefni af alþjóðlegum degi jökla, sem er þann 21. mars ár hvert, opnar ljósmyndasýningin The Glacier Project þann 13. mars í þjóðgarðsmiðstöð Snæfellsjökulsþjóðgarðs. Dagurinn er tileinkaður vitundarvakningu um mikilvægi jökla fyrir umhverfið, ferskvatnsbirgðir jarðar og áhrif loftslagsbreytinga á þá. Markmiðið með deginum er að hvetja einstaklinga, stjórnvöld og vísindasamfélagið til að grípa til aðgerða til að vernda þessa viðkvæmu náttúruauðlind.

Sveitarfélagið Stykkishólmur hefur til leigu tvær íbúðir að Skúlagötu 9. Íbúðirnar eru báðar á fyrstu hæð en alls eru átta íbúðir í húsinu. Íbúð 101 er 81,9 fm að stærð og skiptist í gang, eldhús, tvö svefnherbergi, baðherbergi og stofu. Út af stofu eru svalir með fallegu útsýni yfir Maðkavíkina. Íbúð 103 er 82,4 fm að stærð og skiptist í gang, eldhús, tvö svefnherbergi, baðherbergi og stofu. Út af stofu eru svalir með fallegu útsýni yfir Maðkavíkina.

Líkt og kynnt var á íbúafundi 8. desember 2025 er nú unnið að nýju aðalskipulagi fyrir Sveitarfélagið Stykkishólm, það fyrsta fyrir sameinað sveitarfélag. Í aðalskipulaginu verður mörkuð framtíðarstefna sveitarfélagsins í þróun þéttbýlis og dreifbýlis. Á íbúafundinum, sem fram fór á Höfðaborg þann 8. desember sl., kynnti fulltrúi Alta, fyrirtækisins sem leiðir vinnuna, vinnuferla við mótun nýs aðalskipulags og nálgun við stefnumótun.