Fréttasafn

49. fundur bæjarstjórnar Stykkishólms fór fram fimmtudaginn 4. júní síðastliðinn. Þetta var fyrsti fundur eftir sveitarstjórnarkosningar og því fyrsti fundur nýrrar bæjarstjórnar. Á dagskrá fundar voru meðal annars hefðbundin mál í kjölfar kosninga. Skipaðir voru nefndarmenn í skipulagsnefnd, fræðslunefnd, kjörstjórn og fulltrúar sveitarfélagsins í Samtök sveitarfélaga á Vesturlandi. Þá var Björn Ásgeir Sumarliðason kjörinn forseti bæjarstjórnar og Jakob Björgvin S. Jakobsson endurráðinn bæjarstjóri sveitarfélagsins Stykkishólms fyrir kjörtímabilið 2026-2030. Ráðningin var samþykkt samhljóða.

Þann 12. ágúst 2026 verður almyrkvi á sólu sjáanlegur frá Íslandi í fyrsta sinn síðan 1954. Almyrkvinn sést frá Vestfjörðum, Snæfellsnesi og Vesturlandi, höfuðborgarsvæðinu og Reykjanesskaga. Sveitarfélagið Stykkishólmur afhenti á dögunum leik- og grunnskóla sérstök sólmyrkvagleraugu í tilefni af almyrkvanum sem verður miðvikudaginn 12. ágúst nk.

Notaleg kvöldsundstund verður í Sundlaug Stykkishólms þann 9. júní milli kl. 20:00 og 22:00. Notaleg samvera, ljúf tónlist og hressandi drykkur í boði fyrir viðstadda. Um er að ræða notalega samverustund sem  hentar vel fyrir alla fjölskylduna, íbúa, nágranna og aðra gesti. Athugið að frítt er í sund á þessum tíma. Viðburðurinn er styrktur af Þjóðminjasafni Íslands og Menningar-, nýsköpunar- og háskólaráðuneytinu. Viðburðurinn er hluti af dagskrá „Sundlaugasumars 2026” en verkefnið var sett var af stað í kjölfar skráningar íslenskrar sundlaugamenningar á lista UNESCO yfir óáþreifanlegan menningararf. Það er Svæðisgarðurinn Snæfellsnes sem stendur fyrir viðburðinum í samstarfi við Sveitarfélagið Stykkishólm.

Dagana 31. maí til 4. júní fór fram vinnufundur og vettvangsheimsóknir í tengslum við alþjóðlega verkefnið BEAM – Building Entrepreneurial Attitude and Mindset, sem er samstarfsverkefni sveitarfélaga í Suður-Eistlandi og sveitarfélaga á Snæfellsnesi. Markmið verkefnisins er að efla frumkvöðlahugsun, samfélagsþátttöku og framtakssemi ungs fólks í dreifbýli ásamt því að þróa hagnýtt stuðningslíkan fyrir fagfólk sem starfar með ungu fólki.

Sjómannadagurinn var haldinn hátíðlegur víða um land sunnudaginn 7. júní síðastliðinn. Fulltrúar björgunarsveitarinnar Berserkja lögðu blómsveig við minnisvarða týndra sjómann í kirkjugarðinum og séra Úrsúla Árnadóttir flutti hugleiðingu. Að því loknu var haldið að minnismerkinu á heimleið við höfnina þar sem einnig var lagður blómsveigur. Sigurður Páll Jónsson flutti ræði og sr. Úrsúla fór með blessunarorð. Sjómannadagsmessa var í Stykkishólmskirkju þar sem sr. Úrsúla þjónaði fyrir altari í fjarveru sr. Hildu Maríu.

Sveitarfélagið Stykkishólmur, Vesturbyggð og Reykhólahreppur hafa sent frá sér sameiginlega ályktun vegna ákvörðunar innviðaráðherra um að færa Breiðafjarðarferjuna Baldur úr siglingum á Breiðafirði til að sinna auknu álagi við farþega- og ökutækjaflutninga til Vestmannaeyja frá og með 8. júní nk. Í ályktuninni harma sveitarfélögin og mótmæla harðlega þeirri ákvörðun og því fordæmi sem hún kann að skapa. Sveitarfélögin leggja áherslu á að þau hafi ávallt sýnt því fullan skilning að Baldur gegni hlutverki varaskips fyrir Herjólf þegar Herjólfur er óstarfhæfur eða í slipp, líkt og samningar gera ráð fyrir. Sú staða er hins vegar ekki uppi í þessu tilviki þar sem Baldur er færður úr siglingum á Breiðafirði til að mæta aukinni eftirspurn eftir farþega- og ökutækjaflutningum til Vestmannaeyja.

Þriðja árið í röð standa Alzheimer samtökin fyrir svokallaðri bekkjagöngu og að þessu sinni verður gengið á nokkrum stöðum á landinu, m.a. í Stykkishólmi. Tilgangur göngunnar er að vekja athygli á og stuðla að umræðu um heilabilun sem er mikilvægur þáttur í að minnka fordóma í samfélaginu. Þá er þetta jafnframt liður í því að stuðla að líkamlegri og félagslegri virkni sem eru mikilvægir þættir almennrar heilsu. Í Stykkishólmi verður gengið frá fjólubláabekknum við Ráðhúsið, að bekknum við Samkomuhúsið og áfram að bekknum við Sýsluskrifstofuna. Þær Hildur Lára Ævardsóttir og Guðrún Magnea Magnúsdóttir leiða gönguna sem fer fram laugardaginn 6. júní kl. 13:00

Sátan, þriggja daga rokkhátíð  sem haldin er í íþróttamiðstöðinni í Stykkishólmi,  fer fram dagana 4. - 6. júní. Hátíðin er árleg og var fyrst haldin í sumarið 2024, þetta er því í þriðja sinn sem hátíðin fer fram. Sátan leggur áherslu á að bjóða upp á fjölbreytt úrval af fremstu rokkhljómsveitum Íslands í bland við úrvalssveitir frá erlendri grundu. Tónleikar hefjast í íþróttamiðstöðinni kl. 16:00 dagana þrjá og standa fram yfir miðnætti. Óhætt er því að gera ráð fyrir blómlegu mannlífi í Stykkishólmi næstu daga en auk tónleika býður hátíðin gestum uppá málþing á Fosshótel Stykkishólmi, bingó og golfmót svo eitthvað sé nefnt. Meðal hljómsveita sem koma fram á hátíðinni í ár eru Power Paladin, Stripshow, Sign og Sólstafir.

49. fundur bæjarstjórnar Stykkishólms fer fram fimmtudaginn 4. júní 2026 kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Sem fyrr mun Sveitarfélagið Stykkishólmur bjóða eldra fólki og öryrkjum, með lögheimili í sveitarfélaginu, upp á slátt í heimagörðum. Þessi þjónusta er eingöngu í boði fyrir eldra fólk og öryrkja sem ekki geta sinnt garðslætti né fengið ættingja til þess. Þjónustan er ekki veitt þar sem heimilismenn, 18 ára og eldri, geta annast slátt. Síðastliðið sumar var lagt upp með nýtt fyrirkomulag slátturs sem reyndist vel og verður því sama fyrirkomulag í ár. Fyrirkomulagið er þannig að umsækjendur hafa samband við Ráðhúsið í síma 433-8100 og óska eftir slætti fyrir sumarið.  Aðeins þarf að óska eftir slætti einu sinni, í byrjun sumars, og munu þá starfsmenn Þjónustumiðstöðvar annast slátt yfir sumarið. Slegið verður a.m.k. þrisvar sinnum yfir sumar en oftar ef spretta ef mikil og tilefni til. Greitt er fyrir þrjá slætti í einni greiðslu sem gildir fyrir allan sláttur sumarsins, þ.e. aðeins er sendur einn reikningur fyrir slætti.