Gjaldtaka bílastæða á hafnarsvæði

Hafnarvörður gerir grein fyrir þeim möguleikum sem koma til greina og mun kynna frekari útfærslu á næsta fundi hafnarstjórnar.

Lagt fram til kynningar.

Bæjarráð felur bæjarstjóra að vinna málið áfram á þeim forsendum sem bæjarstjóri gerði grein fyrir á fundinum.

Bæjarráð þakkar fyrir sýndan áhuga á samstarfi og fyrirliggjandi tillögur og óskar eftir kynningum frá Parka lausnum og Green parking.

Fulltrúar frá Parka og Green parking gerðu grein fyrir tillögum sínum. Málinu vísað til nánari vinnslu í bæjarráði.

Lagt fram til kynningar.

Bæjarráð vísar málinu til endanlegrar ákvörðunar á næsta bæjarráðsfundi.

Bæjarstjórn staðfestir afgreiðslu bæjarráðs og vísar gjaldskrá og reglum til síðari umræðu í bæjarstjórn.

Bæjarráð leggur til við bæjarstjórn að samþykkja samþykkt um bílastæðasjóð og gjaldskrá.

Bæjarstjórn samþykkir samþykkt um bílastæðasjóð Stykkishólms og gjaldskrá bílastæðasjóðs Stykkishólms.

Bæjarstjórn felur bæjarráði fullnaðarumboð til afgreiðslu endanlegs samnings við þjónustufyrirtæki vegna fyrirhugaðrar gjaldtöku.

Bæjarráð samþykkir samning og felur bæjarstjóra að undirrita hann fyrir hönd sveitarfélagsins.

Hafnarstjórn staðfestir fyrir sitt leyti samþykkt og gjaldskrá.

Lagt fram til kynningar.

Bæjarráð samþykkir að styðja við ferðaþjónustu á hafnarsvæðinu með því að veita ferðaþjónustuaðilum í veitingarekstri og hafsækinni upplifunarþjónustu heimild til þess að veita viðskiptavinum sínum gjaldfrjáls bílastæði á P1 út árið 2025 með útfærslu sem er í boði í gegnum Parka Lausnir ehf.

Bæjarráð vísar að öðru leyti áframhaldandi gjaldtöku og fyrirkomulagi hennar til umfjöllunar hjá atvinnu- og nýsköpunarnefnd. Í framhaldi af þeim fundi verði haldinn sameiginlegum fundur fulltrúa sveitarfélagsins með ferðaþjónustuaðilum, FAS og öðrum hagsmunaraðilum varðandi útfærslu á gjaldtöku.

Atvinnu- og nýsköpunarnefnd tekur framlagða tillögu til umræðu. Nefndin tekur undir að gjaldtakan á hafnarsvæðinu sé mikilvægur þáttur í uppbyggingu og viðhaldi þeirra innviða sem þjónusta ferðamenn. Nefndin samþykkir fyrirliggjandi tillögu um að styðja við heimild rekstraraðila til að veita viðskiptavinum sínum gjaldfrjáls bílastæði, enda sé slíkt úrræði skynsamleg leið til að styðja við ferðaþjónustu á hafnarsvæðinu í ljósi gjaldtökunnar.

Atvinnu- og nýsköpunarnefnd tekur jafnframt undir að nauðsynlegt sé að boða til sameiginlegs fundar með ferðaþjónustuaðilum, FAS og öðrum hagsmunaaðilum til að móta framtíðarfyrirkomulag gjaldtöku á hafnarsvæðinu.

Samþykkt með þremur atkvæðum Ásmundar Sigurjóns Guðmundssonar, Arnars G. Diego Ævarssonar og Viktoríu Lífar Ingibergsdóttur, fulltrúa H-lista, gegn tveimur atkvæðum Lárusar Ástmars Hannessonar og Ásgeirs Héðins Guðmundssonar, fulltrúa Í-lista.


Bókun fulltrúa Í-lista:
Vegna bílastæðagjalda við hafnarsvæðið
Undirritaðir leggjast alfarið gegn þessari ákvörðun.
Samkvæmt upplýsingum frá ferðaþjónustuaðilum á og við hafnarsvæðið hefur þessi ákvörðun haft neikvæð áhrif á starfsemi þeirra fyrirtækja sem þar starfa en það er öfugt við það sem er raunin þegar haldið er vestar á Snæfellsnesið.
Nokkrar ástæður eru fyrir samdrættinum.
Í fyrsta lagi eru ferðir ferjunnar talsvert færri en í fyrra. Ef bara er horft til sumarsins þá eru það 9 ferðir vikulega í stað 14 áður. Þar til viðbótar eru tímasetningar í sumar talsvert óhagstæðar. Nú í sumar fór ferjan kl. 11:00 og kom aftur kl. 17:00. Farþegar ferjunnar voru því minna að skila sér á veitingahús eða kaffihús. Síðastliðin ár kom ferjan kl. 21:00 að kvöldi og margir notfærðu sér að borða þá og gistu mun frekar í bænum að því er virðist.
Farþegaskipið Særún sigldi ekkert og ekkert kom í staðinn auk þess sem komum skemmtiferðaskipa fækkaði verulega.
Sæferðir ráku áður kaffihús en ekki nú í sumar. Með lokun Sæferða versnar þjónustustigið hér í Hólminum ekki síst á veturna.
Breiðafjörður og umferð ferðamanna þar er líklegast til að vera forsenda viðsnúnings og vaxtar í ferðaþjónustu. Innheimta bílastæðagjalda vinnur þar á móti.
Það þarf að laða að nýja afþreyingu og þjónustu við höfnina og Breiðafjörð. Fá einhvern sem sér tækifæri í að vera með ferðir um svæðið til að fjárfesta og hefja starfsemi. Bílastæðagjald vinnur þar á móti.
Þau rök heyrast að þessi gjaldtaka sé vegna þeirra sem eru langdvölum í eyjunum. Ef svo er þá skítur skökku við að rukka fyrir bílastæði frá því snemma morguns til miðnættis.
Atvinnumálanefndin þarf að sýna að nefndin standi með atvinnurekstrinum. Það þarf að hlúa að þessari atvinnugrein ef undanhaldið og samdráttur á ekki að halda áfram.
Þegar það fer að verða fjölmenni og uppgangur aftur í ferðaþjónustunni í Stykkishólmi verður mögulega rétt að skoða með bílastæðagjöld við höfnina en það er allavega ekki eins og staðan og þróunin er.
Okkar styrkur í ferðaþjónustu ætti að vera Breiðafjörður annars vegar og gamli bærinn og höfnin hins vegar. Höfnin og Súgandisey eru helstu ferðamannastaðir bæjarins. Við erum hins vegar ekkert að vinna með þetta og staða okkar versnar bara milli ára. Engin stefna er í gangi um hvernig við getum gert okkur gildandi með þessi verðmæti.
Undirritaðir telja nauðsynlegt að setja nú þegar af stað greiningu og stefnumótunarvinnu í málefnum ferðaþjónustunnar í Stykkishólmi. Ferðaþjónustuaðilar verði kallaðir að borðinu og gerð verði áætlun um sókn í ferðaþjónustunni á næstu árum.

Lárus Ástmar Hannesson
Ásgeir Héðinn Guðmundsson