Bæjarráð

Lögð fram 34. fundargerð skipulagsnefndar.

Lögð fram 22. fundargerð skóla- og fræðslunefndar.

Lögð fram fundargerð 986. fundar stjórnar Sambandsins frá 10. október 2025.

Lagt fram formlegt erindi, frá Svæðisfulltrúa íþróttahéraða á Vesturlandi og HSH, þar sem óskað er eftir að halda Stjörnuleikana í Stykkishólmi 2. nóvember næstkomandi.

Orkuframboð, bæði rafmagns og heits vatns, og afhendingargeta þessara innviða eru lykilþættir í áframhaldandi uppbyggingu atvinnusvæða við Kallhamra og Hamraenda. Tryggja þarf að fyrirtæki sem hyggjast hefja starfsemi eða byggja upp atvinnurekstur í Stykkishólmi hafi skýrar og aðgengilegar upplýsingar um stöðu orkuframboðs, möguleika á tengingum og framtíðarafhendingu.



Mikilvægt er að sveitarfélagið hafi heildaryfirsýn yfir stöðu mála í samstarfi við veitufyrirtækin, þannig að hægt sé að bregðast tímanlega við aukinni eftirspurn og stuðla að öruggri og sjálfbærri uppbyggingu atvinnulífs. Þetta er jafnframt forsenda þess að geta tekið upplýstar ákvarðanir um skipulag, leyfisveitingar og framtíðarstefnumótun í atvinnu- og umhverfismálum bæjarins.



Mikilvægt er fyrir sveitarfélagið að kortleggja stöðuna í samvinnu við Rarik ohf. (rafmagn) og Veitur ohf. (heitt vatn), nánar tiltekið um núverandi stöðu, helstu áskoranir og framtíðarþörf til næstu 5, 15 og 30 ára. Í því sambandi ber að skoða sérstaklega hvernig áætlanir um uppbyggingu iðnaðarsvæða við Kallhamra (Grænir iðngarðar) og Hamraenda, miðað við núverandi skipulagsáform og byggingarreiti, samrýmast fyrirhuguðu orkuframboði og afhendingargetu. Þannig verður tryggt að umsóknir um tengingar og leyfisveitingar geti tekið mið af raunhæfum forsendum og stuðlað að sjálfbærri og öruggri þróun atvinnusvæða.

Lagt fram frumvarp til laga um breytingu á vegalögum, nr. 80/2007, með síðari breytingum (þjóðferjuleiðir).

Sveitarfélagið Stykkishólmur leggur ríka áherslu á að bæjarumhverfi sé snyrtilegt, öruggt og vel við haldið. Slíkt umhverfi styrkir ímynd og aðdráttarafl bæjarins, stuðlar að jákvæðri upplifun íbúa og gesta og endurspeglar virðingu fyrir náttúru og samfélagi. Regluleg umhirða og ábyrg umgengni við opin svæði eru jafnframt lykilþættir í markmiðum sveitarfélagsins í þessum efnum.



Hafnarstjórn hefur á undanförnum árum lagt ríka áherslu á að ráðist verði í átak til fegrunar og snyrtingar á hafnarsvæðinu við Skipavíkurhöfn, einkum með tilliti til báta og vagna sem hafa staðið óhreyfðir um lengri tíma og jafnvel legið undir skemmdum.



Á 53. fundi umhverfis- og náttúruverndarnefndar var fjallað um sama málefni. Nefndin taldi skynsamlegt að hvetja fyrirtæki og einstaklinga til ábyrgðar og góðrar umhirðu í sínu nærumhverfi, auk þess sem bent var á heimildir heilbrigðisnefndar til að hlutast til um fjarlægingu lausafjármuna, þar á meðal númeralausra bifreiða og bílflaka.



Í framhaldi af þessu samþykkti hafnarstjórn á 5. fundi sínum að leita formlegs samstarfs við Heilbrigðiseftirlit Vesturlands um hreinsun hafnarsvæðisins við Skipavík, í samræmi við framangreindar tillögur, og að unnið verði að því að fjarlægja báta, tæki og önnur farartæki sem ekki eru í notkun.



Sveitarfélagið hefur unnið í samræmi við þessar áherslur síðustu ár, en ljóst er að þörf er á frekari eftirfylgni og aðgerðum til að ná fram markvissum og varanlegum árangri.



Sveitarfélagið vill ganga á undan með góðu fordæmi og tryggja að hafnarsvæðið, sem og önnur svæði í eigu þess, séu snyrtileg, örugg og vel við haldið. Snyrtilegt og vel skipulagt umhverfi stuðlar að jákvæðri ásýnd bæjarins, bætir öryggi og hvetur íbúa, fyrirtæki og gesti til að sýna sama metnað í umgengni og umhverfisvernd.



Lagt er því til að bæjarráð veiti starfsmönnum sveitarfélagsins auknar heimildir til ákvarðanatöku um fjarlægingu lausafjármuna af svæðum í eigu eða umsjón sveitarfélagsins, í því skyni að tryggja heilnæmt, snyrtilegt og öruggt umhverfi í Stykkishólmi.

Lögð fram húsnæðisáætlun sveitarfélagsins í tengslum við vinnu við gerð áætlunar fyrir árið 2026.

Lagður fram viðaukasamningur við rammasamning Sveitarfélagsins Stykkishólms og Alta ehf. vegna endurskoðunar aðalskipulags sveitarfélagsins. Fulltrúar Alta mæta á fundinn til að fara yfir efni samningsins, kynna framvindu og fyrirliggjandi vinnu við endurskoðun aðalskipulagsins.



Jafnframt er lagt til að settur verði á fót starfshópur í tengslum við aðalskipulagsvinnuna, sem hafi það hlutverk að fylgjast með framvindu verkefnisins og vera til samráðs við skipulagsráðgjafa og stjórnkerfi sveitarfélagsins.

Atvinnuveganefnd Alþingis sendir til umsagnar frumvarp til laga um veiðar í fiskveiðilandhelgi Íslands og stjórn fiskveiða (veiðistjórn grásleppu), 153. mál.

Umsagnaraðilar geta sent umsögn í gegnum umsagnagátt Alþingis.



Frestur til að senda inn umsögn er til og með 27. október nk.

Lagt til afgreiðslu breyting á deiliskipulagi Birkilundar vegna nr. 37 og 38. Lóðarmörk á milli þessara lóða virðast hafa færst til við gerð skipulagsins og er lóð 38 minni en 37 stærri en stofnskjölin. Óskað er eftir að gera breytingu á deiliskipulagi til að leiðrétta þessi mistök. Enn fremur spyrja Landlínur hvort sveitarfélagið sjái möguleika á að fella niður skipulagsgjöld vegna þessarar breytingar.



Skipulagsnefnd samþykkti, á 34. fundi sínum, að Landlínur vinni þessa deiliskipulagsbreytingu skv. 3. mgr. 43. gr. skipulagslaga. Vegna óska skipulagshönnuða um það hvort sveitarfélagið sjái möguleika á að fella niður skipulagsgjöld vegna þessarar breytingar/leiðréttingar, vísaði skipulagsnefnd til bæjarráðs.

Á 34. fundi skipulagsnefndar var lögð fram til kynningar breyting á aðalskipulagi Stykkishólms 2002-2022 vegna stækkunar á iðnaðarsvæði við Kallhamra og Hamraenda. Bæjarstjórn þarf að taka afstöðu um að breyta landnotkun landbúnaðarsvæðis sbr. 5. gr. jarðarlaga um lausn lands úr landbúnaðarnotum.

Lögð fram drög að hönnun á Laxártorgi við Aðalgötu í Stykkishólmi. Bæjarráð tók á 26. fundi sínum jákvætt í fyrirligggjandi hugmynd og vísaði málinu til umsagnar í skipulagsnefnd.



Skipulagsnefnd tók á 34. fundi sínum jákvætt í fyrirliggjandi tillögu að torgi og að gengið yrði frá því á snyrtilegan hátt.

Eigandi óskar eftir að fá að byggja þrjú hús á landi Skjaldar.



Skipulagsnefnd taldi á 34. fundi sínum ekki fyrirstöðu fyrir því að heimila byggingu þriggja húsa í landi Skjaldar og taldi að ekki þurfi að breyta aðalskipulagi. Í aðalskipulagi Helgafellssveitar segir að heimilt sé að reisa hús fyrir bændagistingu á jörðum eða jarðarspildum á sérstaklega afmörkuðum lóðum.

Í drögum að samgönguáætlun 2024-2038 og fimm ára aðgerðaáætlun 2024-2028 var gert ráð fyrir lagfæringum á tilteknum köflum Snæfellsnesvegar 54 um Skógarströnd. Uppfærð drög að samgönguáætlun eru væntanleg á haustþingi 2025 og brýnt að áætlunin endurspegli raunverulegan forgang vegarins.



Skógarstrandarvegur er stofnvegur samkvæmt skilgreiningu samgönguáætlunar og hluti grunnnets samgöngukerfis landsins. Vegurinn tengir Snæfellsnes við Dalabyggð og áfram við Vestfirði og Norðurland og skiptir lykilmáli fyrir búsetu, atvinnulíf, þjónustu og ferðaþjónustu á svæðinu. Núverandi ástand vegarins, sem er enn að stórum hluta malarvegur á láglendi, hamlar verulega framþróun og samræmist ekki markmiðum samgönguáætlunar um forgang grunnnetsins.



Bæjarstjórn Stykkishólms, ásamt fastanefndum sveitarfélagsins, hefur ítrekað áréttað mikilvægi Skógarstrandarvegar, líkt og Samtök sveitarfélaga á Vesturlandi og nágrannasveitarfélög. Sveitarfélagið fagnar því að formlegur undirbúningur að þverun Álftafjarðar hafi hafist á árinu 2023 og leggur áherslu á faglegar rannsóknir á umhverfisáhrifum valkosta. Jafnframt hefur verið kallað eftir umferðarteljurum á svæðinu til að styðja við þjónustu- og forgangsröðun á grunni raunumferðar.



Með hliðsjón af framangreindu er brýnt að ný samgönguáætlun endurspegli mikilvægi vegarins: að færa skuli framkvæmdir á vegi 54 um Skógarströnd framar í áætlun, tryggja fullfjármögnun, þar á meðal fyrir þverun Álftafjarðar, og hraða framkvæmdum í samræmi við markmið um uppbyggingu grunnnets samgangna.



Lagðar er fram hugmyndir að veglínu og þverun Álftafjarðar, dags. 5. febrúar 2024, ásamt öðrum gögnum.



Skipulagsnefnd tók á 34. fundi sínum undir fyrri ályktanir sveitarfélagsins, bæjarstjórnar og bæjarráðs um mikilvægi áframhaldandi uppbyggingar Snæfellsnesvegar 54 um Skógarströnd og lagði áherslu á að vegurinn sé í forgangi við ráðstöfun fjármuna á samgönguáætlun. Skipulagsnefnd lagði áherslu á að umferðaröryggi verði haft að leiðarljósi við endanlega ákvörðun um legu vegarins, ný veglína verði samþætt aðalskipulagi sveitarfélaganna og unnin í nánu samráði við Vegagerðina og nærliggjandi sveitarfélög og að verkefninu verði tryggt fjármagn til undirbúnings og framkvæmdar. Skipulagsnefnd hvatti Dalabyggð og Vegagerðina til þess að skoðað færslu á veglínu austan Álftafjarðar þannig að hún fari með ströndinni og þveri ósa Langadalsár og Setbergsár, en með því væri vegurinn með beinni veglínu, snjóléttari og einungis þyrfti að byggja eina brú í stað tveggja ef halda ætti núverandi veglínu.

Lagðar fram hugmyndir um lýsingu og leiksvæði á opnu svæði við Skúlagötu. Óskað er eftir að fá að grenndarkynna hugmyndir fyrir íbúum í nágrenni.



Skipulagsnefnd fagnaði, á 34. fundi sínum, fyrirliggjandi tillögu að endurbættu leiksvæði og samþykkti að grenndarkynna fyrirliggjandi tillögu fyrir íbúum Skúlagötu 1-5, Austurgötu 8 og 10 og Tangagötu 2-8. Skipulagnsnefnd hvatti einnig til þess að haldin verði kynningar- og/eða hugmyndafundur í ráðhúsinu fyrir íbúa á svæðinu.

Lagt fram erindi frá Berglindi Axelsdóttur, verkefnisstjóra læsis hjá Háskóla Íslands, varðandi mögulegt samstarf Grunnskólans í Stykkishólmi við Menntavísindasvið Háskóla Íslands.



Á 22. fundi sínum þakkaði skóla- og fræðslunefnd fyrir kynninguna en taldi að þar sem skólinn vinnur nú þegar með Ásgarði skólaráðgjöf að sambærilegum verkefnum, væri ekki tilefni til samstarfs að svo stöddu. Hins vegar gæti slíkt samstarf verið áhugavert að skoða síðar.

Lögð fram ábending frá íbúa þar sem vakin er athygli á að efla þurfi tónmenntarkennslu í Grunnskólanum í Stykkishólmi.



Málið var tekið til umræðu á 22. fundi skóla- og fræðslunefndar. Vegna skorts á sérhæfðu rými fyrir tónmennt er erfitt að bjóða upp á markvissa og vandaða tónmenntakennslu. Reglulega er haldinn söngsalur og kennarar yngri bekkja syngja og kynna tónlist fyrir nemendum. Í skoðun er að bæta við þematengdri vinnu á næsta ári þar sem boðið yrði upp á tónmennt.

Lagt fram minnisblað unnið af Ásgarði, skólaráðgjöf, varðandi fyrirkomulag úthlutunar stoðþjónustu í sveitarféalginu.



Skóla- og fræðslunefnd fagnaði á 22. fundi sínum innleiðingu á skráningu á grunnfærni nemenda.

Lagt fram minnisblað skólastjóra vegna hugmynda um breytt fyrirkomulag þjónustu í Regnbogalandi.



Á 22. fundi skóla- og fræðslunefndar var rætt var um starfið. Taka þarf ákvarðanir um breytt fyrirkomulag á þjónustunni eftir að nýtt húsnæði hefur verið tekið í notkun. Skóla- og fræðslunefnd hvatti til þess að skoðað sé að setja Regnbogaland undir íþrótta- og tómstundafulltrúa.

Umhverfisganga bæjarstjóra fór fram dagana 15. til 18. september síðastliðna. Lagðar eru fram ábendingar sem fram komu í göngunum.

Lagt fram kauptilboð í íbúð við Skúlagötu 9 ásamt tengdum gögnum.

Lagður fram viðauki 3 við fjárhagsáætlun 2025-2028.

Lögð fram drög að gjaldskrám sveitarfélagsins fyrir árið 2026.

Fjárhagsáætlun 2026-2029 lögð fram til fyrri umræðu.

Lagt fram erindi frá framkvæmdastjórn Kvennaárs 2025, dagsett 6. október 2025. Í erindinu eru sveitarfélög hvött til að leggja sitt af mörkum til að minnast 50 ára afmælis kvennafrídagsins og styðja við þá viðburði sem verða í gangi af þessu tilefni í sveitarfélaginu, sem og gefa konum og kvárum sem starfa hjá sveitarfélaginu kleift að taka þátt í Kvennavekfalli þann 24. október næstkomandi.

Lagt fram erindi frá UNICEF á Íslandi sem hefur nú opnað fyrir umsóknir um þátttöku í verkefninu Barnvæn sveitarfélög.

Lagt fram erindi frá Snæfell þar sem óskar er eftir leyfi til uppsetningar og upptöku á körfuboltaleikjum.

Tekin til umræðu í tillaga forseta bæjarstjórnar að heiðrun íbúa á Norðurljósahátíðinni fyrir aðkomu að lista- og menningarlífi í Sveitarfélaginu Stykkishólmi.